Фудбалската репрезентација на Македонија во сабота го започнува настапот во Лигата на нациите на УЕФА со меч против Фарските Острови на гости. Македонија е фаворит, но најголем проблем за нашата селекција може да бидат времето и теренот, а тоа го најавува и дебитантот во репрезентацијата, Кристијан Трапановски. Фудбалерот на Данди јунајтед е оптимист пред мечот со Фарските Острови, но и воопшто за настапот во Лигата на нациите.
„Задоволство ми е што сум дел од националниот тим на Македонија. Се надевам дека на оваа укажана шанса ќе ги докажам моите квалитети. Одлично се чувствувам, како да сум долго време тука, а не првпат. Целта е да освоиме што е можно повеќе бодови, ако можеме да ги победиме сите натпревари и да се пласираме во следната рунда. Фаворити сме, но во денешно време веќе нема лесни противници. Мислам дека сме поквалитетни од Фарските Острови и дека нема да имаме проблеми со теренот и времето. Ако ние одиграме како што знаеме, нема да имаме проблем да ги освоиме трите бода“, вели Кристијан Трапановски.
