Стефанос Циципас е прв финалист на Отвореното првенство на Австралија во Мелбурн по победата против Карен Качанов со 3:1 во сетови.
Грчкиот тенисер имаше сè во свои раце за максимална победа, но повторно покажа слабост и му подари сет на ривалот во ситуација кога имаше предност од 5:3 во гемови во третиот сет за победа од 3:0.
Претходно ги доби првите два сета со 7:6 (2) и 6:4 и кога се очекуваше да го приведе мечот кон чиста победа без загубен сет, потклекна.
Качанов направи голем пресврт во третиот сет, спаси две меч-топки и во тај-брејк со 8:6 во поени намали на 1:2 во сетови.
Циципас имал неколку вакви ситуации во кариерата, а особено се памети финалето во Париз, на Ролан Гарос во 2021 година.
Тогаш имаше предност од 2:0 против Новак Ѓоковиќ, но загуби со 2:3 и не успеа да ја освои првата гренслем-титула.
Сега пак е можно да има исто финале, но во Мелбурн, ако Ѓоковиќ од 9.30 часот го победи Томи Пол во второто полуфинале.
"The most extraordinary point" 🫠@steftsitsipas digs deep and finds a way to win the rally 👏 @wwos • @espn • @eurosport • @wowowtennis • #AO2023 • #AusOpen pic.twitter.com/43Q9aEmlQ7
— #AusOpen (@AustralianOpen) January 27, 2023
Циципас со победата против Качанов си го разби и малерот на Отвореното првенство на Австралија, каде што досега трипати играше полуфинале и секогаш беше елиминиран, па денеска во четвртиот обид успеа да стигне до меч за титулата.
