ЦСКА Москва славеше со 95:88 во дербито против Реал Мадрид. Битката на титаните им припадна на „армејците“, додека европскиот првак го претрпе вториот пораз во низа сезонава, по вкупно 10 средби во Евролигата.
ЦСКА го направи првиот потег во воведот од мечот. Фуриозна серија од 17-3 на гостите значеше убедлива предност уште на стартот, но јасно беше дека „кралевите“ нема така лесно да се предадат. Реал до полувремето се избори за предност во своја корист, а на паузата се замина со резултат од 41:38.
Сепак, гостите од Москва кон половина од третиот период повторно ја презедоа контролата врз топката, па до самиот финиш ја задржаа предноста, и покрај напорите на Реал да избегне ново разочарување.
Кори Хигинс со 24 поени ја предводеше ЦСКА до осмиот овосезонски триумф, 18 додаде Клајбурн, Де Коло застана на 15 поени. Од составот на Реал, Кампацо со 23 поени беше најефикасен кошаркар.
Резултати Евролига:
Дарушафака – Гран Канарија 71:75
Жалгирис Каунас – Армани Милано 83:78
Макаби Тел Авив – Баерн Минхен 95:71
