Фудбалерите на Валенсија многу потешко од очекуваното стигнаа до пласман во осминафиналето на Купот на кралот. Тие дури после 120 минути игра победија со 1-2 над Картагена, откако натпреварот заврши 1-1 во регуларното време.
Домашните поведоа уште во четвртата минута преку Ортуно, но Калеро во 45-тата минута заработи црвен картон и ја остави својата екипа со играч помалку на теренот. Бројчаната предност на тревникот, фудбалерите на Валенсија ја искористија дури во 73-тата минута, кога Канос израмни на 1-1.
Голот за победа на Валенсија го постигна Гаја во 106-тата минута.
Атлетик Билбао немаше никакви проблеми и со убедливи 0-3 го победи второлигашот Еибар, додека мечот помеѓу Унионистас од Саламанка и Виљареал беше прекинат пред почетокот на продолженијата, бидејќи снема струја на стадионот. Во регуларниот дел натпреварот заврши 1-1.