Голот број 700 кој го постигна Кристијано Роналдо ги мотивираше статистичарите да ископаат податоци од историјата на фудбалот и да покажат дека има рекорди кои никогаш нема да бидат соборени. Ако еден Роналдо или Лионел Меси се на 100 и кусур голови од првиот стрелец во историјата, што останува за другите.
Еве дел од светските рекорди, а проценете кој од нив е „недопирлив“.
НАЈМНОГУ ОДИГРАНИ МЕЧЕВИ ЗА РЕПРЕЗЕНТАЦИЈА – 184
Ахмет Хасан од Египет е рекордер по број на настапи за националниот тим, но тој сигурно ќе биде симнат од врвот. Серхио Рамос има 168 и уште е активен, би се рекло и незаменлив во Црвената фурија, па освен ако не се случи нешто несакано, капитенот на Шпанија може да дојде и до 200 настапи за репрезентацијата. Кристијано Роналдо за Португалија играл 162 пати, па и мераклијата за персонални рекорди може да игра уште долго, додека не биде прв.
НАЈМНОГУ ОДИГРАНИ МЕЧЕВИ – 1.390
Легендарниот англиски голман Питер Шилтон бранеше на 1.390 официјални натпревари во кариерата и го држи рекордот на фудбалер со најмногу настапи. Подиумот го комплетираат Рожерио Сени со 1.241 и Чави со 1.140. На Шпанецот му се бројат и мечевите за Барселона Б. Ова е еден од рекордите кои нема да биде лесно да се урнат.
НАЈМНОГУ ГОЛОВИ НА ЕДЕН МУНДИЈАЛ – 13
Жист Фонтен на СП во 1958 година даде дури 13 гола и тоа е рекорд кој стои веќе 60 години, иако сега се играат повеќе натпревари. Најмногу му се доближи Роналдо со 8 гола во 2002 година. Инаку рекордер на светските првенства е Мирослав Клозе со 16. Меси и Роналдо заедно имаат 15, а следниот Мундијал во Катар им е последна шанса да направат нешто.
НАЈМНОГУ ГОЛОВИ ЗА ЕДЕН ИГРАЧ – 805
Чешкиот Австриец Јозеф Бичан, кој играше пред ималку по Втората светска војна, со 805 погодоци е најефикасниот фудбалер на сите времиња. Од активните, најблиску до него се Кристијано Роналдо со 700 и Лионел Меси со 668.
НАЈМНОГУ ГОЛОВИ НА ПОЕДИНЕЦ ЗА РЕПРЕЗЕНТАЦИЈА – 109
Али Даеи од Иран е единствениот фудбалер во историјата со повеќе од 100 голови за националниот тим. Но, Кристијано Роналдо има 95 и можеби ќе го нападне рекордот. Меси има 68 гола за Аргентина и е далеку зад нив, а 27-годишниот Нејмар има 60.
НАЈМНОГУ ГОЛОВИ ЗА ИГРАЧ ВО ЕДНА ГОДИНА – 90
Лионел Меси во календарската 2012 година даде неверојатни 90 гола и со тоа го надмина рекордот на Герд Милер од 1972, кој беше 85. Меси е најдобар и според головите во една сезона (82), што е за седум подобро од Пеле.
НАЈМНОГУ ТИТУЛИ ВО ЛШ И КЕШ – 6
Некогашниот фудбалер на Реал Мадрид, Франциско „Пако“ Генто, засега е единствениот играч со шест трофеи од најсилното клупско натпреварување во Европа. Од активните играчи, Кристијано Роналдо има пет титули во ЛШ и засега тој е прв на листата кои би можеле да го загрозат Генто. По четири трофеи имаат Меси, Пике, Рамос, Марсело, Варан, Крос, Бензема, Карвахал, Иско, Начо, Модриќ, Каземиро и Бејл.
НАЈМНОГУ ОСВОЕНИ МУНДИЈАЛИ – 3
Кралот на фудбалот, Пеле, со Бразил стана светски првак во 1958, 1962 и 1970 година. Кристијано Роналдо, Меси, Кројф и Ди Стефано се меѓу легендите кои никогаш не станаа светски прваци, па со тоа се гледа дека е тешко трипати да се биде на врвот на светот со својата репрезентација.
