Шкендија Арачиново направи чекор назад во трката за пласман во повисок ранг, откако на домашен терен ремизираше без голови против Беласица во денешното коло од Втората лига.
Домаќините имаа повеќе од играта и создадоа неколку солидни можности, но реализацијата изостана, па бодовите беа поделени. Најмногу од ваквиот исход профитираше ФК Скопје, кој со сигурни 0-2 на гостувањето кај Вардар Неготино се искачи на врвот на табелата. Пиратите од Автокоманда сега со внимание го очекуваат исходот од дербито меѓу Охрид и Брегалница кое се игра од 18 часот во Штип.
Во долниот дел од табелата продолжува жестоката битка за опстанок, каде сите директни конкуренти забележаа победи. Детонит Плачковица убедливо славеше против Победа со 6-0, Тетекс беше сигурен против Саса (3-0), а три бода освои и Кожуф против Големо Коњари (3-0).
Победа запиша и тимот на Новаци, кој со 2-0 ја совлада Преспа, додека Осогово со убедливи 3-0 беше подобар од Слога Виница.
По ова коло, Скопје е лидер со 50 бодови, пред Охрид и Шкендија Арачиново кои имаат по 49. Брегалница е веднаш зад нив со 46 бодови и со евентуална победа во дербито во Штип може дополнително да ја вжешти борбата за промоција.
