Доколку поради епидемијата на Коронавирусот се донесе драстична одлука за прекин на фудбалското првенство во Италија, титулата ќе му припадне на Јувентус, иако во моментов лидер на табелата во Серија А е Лацио. Правилата велат дека во случај на прекин на шампионатот, првак е тимот кој водел по последното комплетирано коло. Со оглед на тоа дека последно целосно коло кое се одигра беше 24-тото, ќе се гледа табелата по 24-тото коло, а тогаш прв беше Јуве.
Италијанската лига била прекината само во 1914/1915, кога земјата се вклучи во Првата светска војна. Тогаш се играше во две групи, север и југ, и во финалето требаше да се сретнат Џенова од северот и Лацио од југот. Титулата ја доби Џенова бидејќи прва се пласирала во финалето. Сега ако се прекине Серија А, Џенова ќе испадне во втора лига, заедно со Бреша и СПАЛ.
Министерот за спорт на Италија, Винченцо Спадафора, потврди дека првенството нема да биде прекинато, туку ќе продолжи, но без присуство на публика. Со тоа би продолжила спортска битка за трофејот, а гледачите би се заштитиле.
