Шпанскиот тенисер Карлос Алкарас се пласира во осминафиналето на турнирот од мастерс серијата 1000 во Мадрид, откако во два сета го елиминира Бугаринот Григор Димитров.
Бранителот на трофејот и втор тенисер на АТП ранг-листата, славеше со 6:2,7:5 за 92 минути игра. Алкарас во првиот сет, два пати го одзеде сервисот на Димитров и без проблеми го реши со 6:2.
Во вториот сет, двајцата тенисери беа сигурни на свој сервис во првите пет гема, по што Димитров прв направи брејк и поведе со 4:2. Шпанецот веднаш направи рибрејк и се врати во игра. Тенисерите го чуваа својот сервис до 11-от гем кога Алкарас повторно направи брејк и поведе со 6:5,а потоа на свој сервис, ја искористи втората меч топка.
Шпанецот во осминафиналето ќе игра против Александер Зверев кој на Французинот Грение му дозволи да освои само еден гем.
