Аргентина ќе биде раат за Мундијалот, селекторот Скалони останува до 2026 година (Фото)

Аргентинците симнаа едно гајле непосредно пред стартот на фудбалскиот Мундијал во Катар и се договорија со селекторот Лионел Скалони да го продолжи договорот до 2026 година.

Me enorgullece contarles que hemos arreglado la continuidad de Lionel Scaloni como DT de Argentina hasta el mundial de 2026. Seguimos apostando al proyecto integral de selecciones. Hay Scaloneta para rato!! pic.twitter.com/64Cvg6EmSN

— Chiqui Tapia (@tapiachiqui) September 28, 2022

Поранешниот играч на Депортиво Ла Коруња, Вест хем, Лацио, Аталанта и неколку јужноамерикански екипи се покажа како многу успешен селектор на Гаучосите.

Тој ги предводеше до пехарот во Копа Америка лани во Бразил, што им е прв трофеј на Аргентинците од 1993 година.

Скалони е селектор на Аргентина од 2018 година и ќе направи низа од најмалку 8 години ако успее да остане до крајот на новиот договор што е важечки до 2026 година.

Ноќеска со победата против Јамајка од 3:0 Аргентинците ја продолжија блескавата серија од 35 меча без пораз и сега им е потребно да останат непоразени на трите дуели во фазата по групи на Мундијалот за да бидат апсолутни рекордери, пред Италија, која сега е на врвот со серија од 37 меча без пораз.

Гаучосите ќе играат во Ц групата во Катар против Саудиска Арабија на 22 ноември, четири дена подоцна против Мексико и на 30 ноември со Полска.