Челзи доживеа тежок пораз на гостувањето кај Брајтон со 0-3, резултат што дури и не ја отсликува целосно доминацијата на домаќините.
Натпреварот започна лошо за Сините од Лондон. Веќе во третата минута, Каору Митома се најде во одлична шанса, но Роберт Санчез интервенираше и го спаси својот тим.
Сепак, по изведениот корнер, Челзи капитулираше. По голема дезорганизација во одбраната, Јан Пол ван Хеке погоди за 1-0.
Во продолжението, Брајтон постојано создаваше простор и лесно влегуваше во шеснаесетникот на гостите, додека Челзи делуваше неорганизирано и без јасна идеја. Домаќините имаа уште неколку шанси да ја зголемат предноста, а Санчез повторно беше на тест.
Во 56-тата минута, Брајтон го удвои водството по одлична акција, Џорџинио Рутер асистираше, а Карлос Балеба погоди за 2-0.
До крајот, Челзи не успеа да се врати во игра, а конечниот удар дојде во судиското продолжение кога Дени Велбек го искористи својот момент и постави конечни 3-0, за убедлива победа на Брајтон.
