„Воините“ од Голден стејт експресно им се вратија на победите по вчерашното разочарување од ЛА клиперс. Ноќеска настрада тимот на Атланта хокс со конечни 110:103. Во отсуство на Стеф Кари и Дрејмонд Грин, Дурант и Томпсон го предводеа шампионот до 12-тата овосезонска победа.
Атланта во поголемиот дел од средбата парираше на фаворизираниот Голден стејт, на изненадување, на паузата заминаа со блага предност од +3. Сепак, со дополнителни сили, Вориорс ја презедоа контролата на мечот и не дозволија нов шок.
Кевин Дурант со 29 поени и шест скока се истакна како најефикасен, Томпсон додаде 24 поени и четири асистенции. Кај Атланта, најрасположен на паркетот беше Таурин Принс со 22 поени.
Хјустон забележа триумф на тешкото гостување кај Денвер нагетс со конечни 109:99. „Ракетите“ им нанесоа дополнителни проблеми на Нагетси, кои наредија четири порази но низа. Триото Харден-Пол-Капела комбинираше 77 поени од вкупно 109 кои ги постигнаа гостите, младиот центар постигна 24, а „брадата“ беше расположен и да мести топки, па оствари дабл-дабл учинок од 22 поени и 11 асистенции. Пол заврши со еден поен помалку.
Монти Морис беше најефикасен кај поразените со 19 поени, а ниту дабл-дабл учинокот на Никола Јокиќ (14 поени, 12 скока) не беа доволни за да се прекине негативната серија во која влезе франшизата од Колорадо.
Кливленд со триумфот од113:89 на Шарлот хорнетс ја забележа само втората победа во 13-тиот овосезонски натпревар.