Њукасл ги погоди двете летни засилувања, Калум Вилсон и Џеф Хендрик, барем според впечатокот што стрелците на головите во победата од 2:0 против Вест Хем го оставија на мечот во Лондон.
Калум Вилсон со интересен погодок, што беше на работ на регуларноста му донесе предност на Њукасл од 1:0 во 56. минута, а му асистираше токму Хендрик.
Со удар со ѓон Вилсон беше за влакно побрз од голманот Лукаш Фабијански и ја протна топката во домашната мрежа.
За Калум ова беше деби-гол во дресот на новиот клуб, откако летово се пресели во Њукасл од редовите на Борнмут.
Со погодок и тоа многу атрактивен печат на одличното деби за Њукасл стави и Хендрик во 87. минута. Доскорешниот играч на Барнли погоди со силен удар од десеттина метри, а повторно немоќен беше Фабијански.
