Шансел Мбемба, дефанзивецот на Олимпик Марсеј, се соочува со сериозни закани по натпреварот со Тотенхем, на кој по еден воздушен дуел тешко го повреди еден од најдобрите фудбалери на Петлите и на репрезентацијата на Јужна Кореја, Сон Хеунг-мин.
Сон доживеа вистински нокаут по еден воздушен дуел со Мбемба, по што падна на тревата и лежеше сè додека не пристигнаа лекарите на Тотенхем.
Подоцна е утврдено дека Кореецот има скршеница на коските на лицето околу левото око и дека ќе мора да оди на операција. Тоа значи дека Сон најверојатно ќе го пропушти Светското првенство во Катар, кое започнува на 20 ноември и ќе трае до 18 декември. Првиот натпревар на неговата репрезентација е закажан за 24 ноември против Уругвај.
Поради повредата, буквално збеснаа навивачите во Јужна Кореја и преку интернет му упатија илјадници заканувачки пораки на Мбемба во кои му посакуваат смрт, да умре во агонија.
Сон досега одигра 106 натпревари за репрезентацијата на Јужна Кореја и постигна 35 гола.