Астон вила и Стивен Џерард се блиску до договор и се очекува големата легенда на англискиот фудбал да биде новиот менаџер на тимот од Бирмингам.
Најавено е дека се „пеглаат“ детали за да дојде до договор меѓу двете страни, што ќе значи камбек на популарниот Стиви-Џи во Премиер лигата.
Џерард е актуелен тренер на шкотскиот гигант Глазгов ренџерс и во ланската сезона ги предводеше до подвиг и титула без ниту еден пораз.
Со тоа великанот од Шкотска под команда на Џерард ја освои шампионската круна по 10 години пауза и го освои рекордниот 55-ти пехар како шампион на оваа земја.
Астон вила има пет порази по ред во Премиер лигата и по последниот, викендов од Саутхемптон, го смени менаџерот Дин Смит.
Најавено е дека најдоцна до петок ќе биде именуван неговиот наследник, а големи се шансите тоа да биде Стивен Џерард.