Промотерот Еди Херн, во Лос Анџелес преговара за организирање на боксерски спектакл помеѓу Ентони Џошуа и Дионте Вајлдер. Само неколку дена по битката на Вајлдер со Тајсон Фјури, која заврши нерешено, Херн веќе е во преговори и договара детали околу наредната борба во тешка категорија, од која победникот може да си замине со појасите во сите пет верзии.
Неофицијално, Херн планира „борбата над борбите“ да се одржи на 13-ти април, на „Вембли“ во Лондон, каде што Британецот Џошуа, кој е владетел во четири верзии, ќе биде во улога на домаќин, а Американецот Вајлдер би бил предизвикувач.
Откако викендов Вајлдер и Фјури ремизираа и останаа непоразени, кај двајцата имаше желба за реванш и нова борба во која речиси сигурно би имало победник. Се предлагаа Лондон и Лас Вегас, но Херн сака Џошуа да боксува со Вајлдер, кој го има појасот на ВБЦ.
Херн мисли дека нерешениот резултат му оди во прилог за полесно да дојде до Вајлдер, бидејќи ако победеше, можеби ќе бегаше од дуел со Џошуа. Вака, Вајлдер чувствува дека би го загубил реваншот против Фјури, па би се обидел против Џошуа.
