Трансфер-сагата на Кристијано Роналдо како да нема крај ова лето, а најнова епизода е дека сега има шанси да му биде соиграч на Елиф Елмас во Наполи.
Популарниот ЦР7 сака да игра за клуб што ќе настапува во Лигата на шампионите, а Наполи е дел од елитата и ќе игра во луксузната лига.
Шпански „Ас“ објави дека Наполи е заинтересиран за Роналдо, а се спомнуваат добрите односи меѓу неговиот агент Жорж Мендеш и сопственикот на клубот од Неапол, Аурелио де Лаурентис.
„Роналдо може да биде нашиот нов Марадона“, вели Де Лаурентис, а пренесува „Ас“.
Како потсетување се наведува големиот пресврт што го направи Наполи кога во 1984 година во клубот пристигна легендарниот Марадона.
Неапол живееше во фудбалски транс, а Наполи со Марадона во тимот освои две титули, единствени досега во клупската историја.
Португалецот има играно во италијанската Серија А, и тоа за големиот ривал на Наполи, за тимот на Јувентус од 2018 до 2021 година и лани се врати во Манчестер јунајтед.
Роналдо нема дилеми дека ќе си замине од Манчестер јунајтед, а досега се шпекулираше дека ќе се пресели во ПСЖ, Челзи, Баерн Минхен, Спортинг, Атлетико Мадрид…
