Светската Фудбалска Асоцијација, ФИФА, се најде во големи проблеми само на пет дена пред ждрепката за Светското првенство за играчи до 20 години. Домаќин на турнирот е Индонезија, а за првпат во историјата Израел обезбеди учество на ваков турнир. Во земјата домаќин се организираат протести против учеството на Израел, но и со барање да им се забрани влез во земјата. Индонезија ја поддржува Палестина во спорот со Израел и тоа е причината за протестите.
Светското првенство треба да се одржи од 20 мај до 11 јуни, а ждрепката е одложена и ФИФА бара начин како да се справи со оваа несакана ситуација. Една од опциите е Израел да не игра на Светското првенство за играчи до 20 години, но втората е да ѝ биде одземено домаќинството на Индонезија, а притоа да биде суспендираната и нивната сениорска репрезентација од Квалификациите за Светското првенство во 2026 година.
Претседател на Фудбалскиот сојуз на Индонезија е поранешниот сопственик на Интер од Милано, Ерик Тохир. Воедно тој е и претседател на Олимпискиот комитет на оваа земја.