Одбранбениот играч на Кадис, Рафаел Хименес Жарке, или попознат по прекарот Фали, објави дека нема да тренира со соиграчите ниту да игра фудбал додека не се пронајде вакцина против ковид-19.
Шпанците го прекинаа првенството на 13 март, кога Ла Лига и Сегунда беа ставени во „лер“, а се очекува да играат повторно од јуни.
Кадис е второлигаш и има мака да го врати 26-годишниот Фали на тренинг. Дефанзивецот одигра 23 меча сезонава за лидерот во Втората шпанска лига и е важен дел од тимот што бие битка за промоција во највисок ранг.
Фали се закани дека размислува и да се откаже од фудбалот, а цврсто го брани својот став да не игра додека не биде вакциниран против корона-вирусот.
„Нема да играм фудбал додека не биде пронајдена вакцината. И ќе се откажам од платата бидејќи имам свои принципи од кои не отстапувам“, рече Фали.
Најави дека дури и да добие отказ, нема да го тужи клубот, а вели и дека има и други фудбалери кои се плашат да тренираат и да играат фудбал додека не се разреши комплетно кризата со корона-вирусот.
„Нема да именувам никого, но знам и други фудбалери што стравуваат од зараза, но не сакаат јавно да говорат“, додава Фали.
