Без поголеми проблеми, очекувано, Новак Ѓоковиќ триумфираше на АТП 500 турнир во Токио. Најдобриот тенисер во светот за прв пат беше дел од турнирот, а во финалето против Џон Милман славеше со 6:3, 6:2. Ова беше прв турнир на кој Србинот се појави, по откажувањето поради повреда на САД Опен.
Со мечевите кои ги одигра во Токио, повеќе од јасно е дека повредата на рамото е минато. Финалето воопшто не делуваше дека е меч за трофеј. Траеше едвај еден час и 10 минути, а Австралијанецот успеа да освои вкупно пет гема.
На крајот, Ѓоковиќ го подигна трофејот и тоа на теренот на кој за следната година е закажано да се игра олимпискиот тениски турнир на Игрите во Токио. Ноле почувствува како е да се освојува турнир во Токио, сега му останува да остане во иста форма и следната година, па да атакува на олимпиското злато.
