Никола Ѓуретановиќ е пливачот кој секако ја одбележа 2025 година кога се работи за спортистите кои се дел од индивидуален спорт. Момчето кое пред неполни два месеца наполни 18 години, созрева додека напорно тренира во базените и се бори со времето, во обид на секоја наредна трка да биде побрз.
Ѓуретановиќ имаше многу успеси во годината која ја оставаме зад нас. Интересно е дека тој беше државен првак и на Македонија и на Србија, што доволно зборува за неговиот огромен потенцијал.
„За мене на спортски план 2025 година беше навистина динамична и предизвикувачка бидејќи имав голем број натпревари и трки, а со самото тоа и зголемен обем на работа, која секако бара континуирана посветеност. Покрај тоа што повторно бев државен првак на Македонија, учестував и на бројни меѓународни натпревари, а во летниот период и на младинско европско и светско првенство, но се како еден динамичен пат и процес за целите кои следат во мојот испланиран 4-годишен олимписки циклус и подготовката за Олимписките игри во 2028 година“, вели тинејџерот Ѓуретановиќ.
Освен фокусот за настап на ЛОИ 2028 година, јасно е дека ќе има многу настапи и во годината која ни следи, а Европското првенство во Париз ќе биде во главниот настан во 2026 година.
„Секако дека кон тој пат за ЛОИ 2028 имам и краткорочни цели, како што е Европското првенство во Париз кое ме очекува оваа сезона, односно во 2026 година, и тоа за мене е една важна цел, посебно поради фактот што во крајот на 2025 година испливав најдобар резултат и нов рекорд на Македонија во дисциплината 200 метри слободно. Навистина сум горд бидејќи дојде како едно убаво финале на целата 2025 година. Продолжувам да работам посветено кон целите и со Божја волја да успееме да се радуваме и во следнава 2026 година. Среќна Нова година и среќни божиќни празници на сите“, беше пораката на пливачот од кој Македонија очекува уште многу радости во годините што следуваат.
