Македонскиот олимписки комитет (МОК) побара смена од директорот на Агенцијата за млади и спорт (АМС), Наумче Мојсовски, и запирање на доделување на ваучери за спортските федерации, екипи и спортисти за 2023 година.
Претседателот на МОК, Даниел Димевски, упати писмо до Владата и до вицепремиерката Славица Грковска во кое укажува на лошото работење на АМС.
Реакцијата на МОК доаѓа откако денеска Државната комисија за спречување на корупцијата (ДКСК) донесе одлука да достави иницијатива до Јавното обвинителство за кривично гонење на Мојсовски и членовите на централната комисија на АМС поради основани сомнежи за злоупотреба и непочитување на ваучер-системот на финансирање фондации и спортски клубови во периодот од 2020 до 2022 година.
Писмото на МОК до Владата ви го пренесуваме во целост:
„Почитувана Вицепремиерке, почитувана Г-ѓа Грковска,
Почитувајќи ја Вашата позиција првенствено насочена кон добро владеење, транспарентност и отчетност, одбравме да Ви се обратиме на најтранспарентниот начин, со јавно писмо.
Олимпискиот комитет на Северна Македонија е највисока невладина спортска институција согласно Законот за спорт, член 17.
Согласно својата позиција и одговорност, должни сме да предупредиме дека и покрај општото јавно мнение и незадоволство од начинот на распределба на финансиските средства од страна на АМС во целост поткрепени со наодите на Комисијата за спречување на корупција и дефинитивно потврдено и докажано со заклучоците во
Конечниот Извештај на Државниот завод за ревизија, каде што негативно е оценета работата на АМС по сите точки и основи, нејзиното раководство во ист и непроменет состав продолжува со истите криминални практики.
Почитувана Г-ѓа Грковска, во изминатиов период во повеќе наврати со задоволство ги слушавме Вашите излагања во кои цврсто и одлучно повикувавте на неселективно доследно применување на принципите на одговорност, отчетност, транспарентност и добро владеење и управување со јавните финансиски средства за сите носители на јавни функции.
Веруваме дека со должно внимание сте го прочитале Конечниот Извештај на Државниот завод за ревизија, каде што прецизно се констатирани сите незаконски дејанија кои, за жал, се пракса во работењето на раководството на АМС. Внимавајте, се работи за милионски суми распределени без никаква контрола и механизми.
Дополнително, веруваме дека Ве загрижува фактот што од страна на Агенција за заштита е правото на слободен пристап до информациите од јавен карактер, АМС е рангирана на катастрофално 115-то од 120 места како крајно нетранспарентна организација, што само по себе многу кажува!!
Дојде време да покажете на јавна сцена пред сите нас кои работиме и живееме за и во спортот дали Вашите зборови и заложби имаат суштина или се само празни политички флоскули.
Согласно ова, ја повикуваме Владата и Вас лично како најодговорен функционер за оваа сфера, да го исполните јавно даденото ветување за чесно, одговорно и транспарентно работење на од Вас избраните и поставени функционери и да го разрешите директорот и комисиите поставени од него и да назначите нови, чесни и професионални лица кои доследно ќе го применуваат Законот, правилниците и критериумите за доделување на средства на сите спортски субјекти.
Со оглед на тоа што во моментов тече постапката за доделување ваучери за 2023 година, бараме ИТНО ЗАМРЗНУВАЊЕ НА ПОСТАПКАТА сè до именувањето на новите членови на Централната комисија.
Одговорноста за брза и ефективна реакција е Ваша и е исклучиво во Ваши раце и нема простор за префрлање на вината кај нефункционалниот судски систем.
Македонските спортисти тоа го заслужуваат“, стои во соопштението на МОК.
