Иднината на хрватската легенда Лука Модриќ е неизвесна. Ветеранот минатото лето потпиша за Милан како играч на една сезона, со можност за продолжување на уште една. Но, таа опција зависеше исклучиво од неговата желба да остане во редовите на Росонерите.
По разочарувачкиот крај на сезоната, неиграњето во Лигата на шампионите следната година и отказот за Масимилијано Алегри, ситуацијата дополнително се искомплицира.
И покрај тоа, единствениот човек кој остана по големите промени во раководството на Милан, Златан Ибрахимовиќ, ќе направи сè што може за да го задржи Модриќ уште една сезона.
„Можеш да бидеш лидер на многу начини. На пример, сега го имаме Модриќ. Тој е роден лидер, не е од оние што зборуваат многу… Не зборува многу, но е лидер на теренот благодарение на своите квалитети и способности. Постојат и лидери кои се подиректни и поразговорливи. Сè зависи од психолошкиот аспект на играчот“, изјави Ибрахимовиќ.
Во следните неколку дена, со приближувањето на Светското првенство, Ибрахимовиќ наводно ќе се сретне со Модриќ со цел да го убеди да потпише нов договор со Милан и да ја продолжи својата кариера. Втората опција за Модриќ е да ја заврши кариерата, да се врати да живее во Мадрид и да добие одредена функција во Реал.
