Легендарниот чилеански напаѓач Алексис Санчес по завршувањето на договорот со Олимпик Марсеј остана без клуб. Според италијанските медиуми, тој сега е пред враќање во Интер, клуб каде што мина три години и одигра 109 натпревари, на кои постигна 20 гола.
Триесет и петгодишниот Чилеанец би заработувал по три милиони евра годишно, што значи дека не би бил преголем товар за буџетот на клубот од Милано, а би бил и тоа како одлична опција за нападот на финалистот од последната Лига на шампиони.
Алексис Санчес потекнува од академијата на Кобрелоа, а во својата татковина настапуваше и за Коло Коло. Во Европа освен за Интер и Марсеј, го има носено дресот и на Удинезе, Барселона, Арсенал и Манчестер јунајтед, а има настапи и за Ривер плејт од Аргентина.
