Алексис Санчес пред почетокот на сезоната пристигна во Интер како позајмен играч од Манчестер јунајтед и требаше да биде големо засилување за калчолигашот во трката за титулата во Серија А. Иако договорот беше позајмицата да трае една сезона, сепак може да се случи Манчестер јунајтед да го добие чилеанскиот напаѓач назад на „Олд Трафорд“, и тоа до крајот на овој месец.
Поради честите повреди, Санчес во дресот на Интер одигра само седум меча и даде еден гол. Дури и по закрепнување од повредите, Чилеанецот не е прва опција на тренерот Антонио Конте затоа што во нападот загарантирано место имаат Ромелу Лукаку и Лаутаро Мартинес.
На Манчестер му е потребен напаѓач затоа што Маркус Рашфорд е повреден и ќе отсуствува уште неколку недели. Англиските медиуми веруваат дека Санчес во следните два-три дена ќе се врати на „Олд Трафорд“.
