Мемфис гризлис ја слави највисоката победа на гостински терен во клупската историја откако го демолира слабиот тим на Хјустон рокитс со 133:84.
Гостите ги добија сите четири периоди, а на крајот ѝ се радуваа на победата од 49 разлика, што е највисока откако тимот во 2001 година се пресели од Ванкувер во Мемфис.
Винслоу со 20 поени ги предводеше Мечките до клупска историја, а неколку црни рекорди запишаа и домаќините. Погодија само 27,7 отсто од упатените удари, што е најнизок процент од постоењето на Хјустон. Погодија само 23 од вкупно 83 удари од поле, со што го израмија негативниот рекорд со најмалку реализирани шутеви.
Ракетите имаа и неверојатно лош ефект со ударите за три поени и погодија само 4 тројки од 45 обиди, што е 8,9 отсто, или најниско во историјата на двојниот НБА-шампион.
Низата од 11 порази по ред е најдолга во последните 20 години за Хјустон, па сите овие негативни рекорди се само показател за мизерната партија баскет што ја прикажаа Џон Вол и соиграчите против Мемфис.
За разлика од нив, одлична ноќ со прекрасни индивидуални учиноци има Бредли Бил, Пи-Џеј Вашингтон и Девин Букер, сите со над 40 постигнати поени.
Бил уфрли најмногу, дури 46 поени, но неговиот тим Вашингтон визардс загуби од Бостон селтикс со 110:111, најмногу благодарение на поените на Џејсон Тејтум на 5 секунди до крајот.
Букер имаше 43 поени во победата на Феникс санс против Минесота тимбервулфс со 118:99, а Вашингтон со 42 поени ги предводеше Шарлот хорнетс до победа против Сакраменто кингс со 127:126.
