Селекцијата на Хрватска која важи за кандидат за освојување на медал на Светското првенство во ракомет, многу лошо го почна настапот на шампионатот во Египет, играјќи само 29-29 против Јапонија. Хрватите многу опуштено влегоа во мечот и откако поведоа со 1-0 (нивно единствено водство во текот на средбата), Јапонците беа многу подобри во првото полувреме, во неколку наврати имаа и шест гола предност, но Хрватска направи серија од 3-0 и на полувреме замина со минус три.
Тимот на селекторот Лино Червар постојано бркаше негатива, така беше и на крајот, па мораа да се задоволат само со бод. Израмнивачкиот гол за Хрватска го даде Чупиќ од пенал во последната секунда. Добра вест за Хрватска е што и на СП во 2003 имаше лош старт, сензационално загуби од Аргентина, но на крај го освоија златото.
Затоа, сила на стартот на Мундијалот демонстрираше Германија, која го разби Уругвај со 43-14, а со истиот резултат како Хрватска и Јапонија, 29-29, одиграа и Шпанија и Бразил. И ова е изненадување бидејќи Шпанците важеа за фаворити, но Кариоките беа подобри во второто полувреме.