Англичаните ќе ги доиграат преостанатите девет кола од Премиерлигата во термин од 8. јуни со 27. јули, објави британски „Тајмс“.
Ова е планот на Владата во координација со главните фудбалски фактори во Англија и ќе биде наскоро соопштен, објави „Тајмс“.
Ваквиот распоред значи дека за неполни 50 дена ќе треба да се одиграат девет кола во најквалитетната англиска лига и плус уште неколку заостанати натпревари.
Ако биде прифатен концептот, тогаш љубителите на англискиот фудбал ќе гледаат макси-реприза од божиќното и новогодишното фудбалско шоу што е стандардно за Англичаните, во период кога се играат неколку врзани кола за десеттина дена.
Ливерпул конечно ќе има шанса на терен да потврди дека е најдобар, што црвените од „Енфилд Роуд“ го презентираа до прекинот на сезоната и со две победи да ја осигураат првата титула, откако се игра Премиерлигата.
Со 25 бода предност најквалитетниот тим сезонава во Англија има шанса и да стаса до својата 19. титула во Англија, што ќе биде апсолутно заслужено и потврдено на терен, речиси сигурно од 8. јуни до 27. јули.
Планот го пофалија премиерлигашите кои се информирани за термините за доигрување на сезоната, а тоа ќе им дојде добро и на актуелниот шампиони на Англија, фудбалерите на Манчестер сити, кои имаат голема шанса да го елиминираат Реал Мадрид во Лигата на шамлионите.
Сити победи на првиот меч во Мадрид со 2:1, а доигрувањето на сезоната во ЛШ е предвидено за во август, месец што ќе биде резервиран само за еврокуповите. Во ЛШ се уште игра и Челзи, но лондончани имаат само теоретски шанси да ја анулираат негативата од 0:3 против Баерн, на кого ќе му бидат гости во осминафиналниот реванш.
Англија ги има и Вулверхемптон и Манчестер јунајтед како претставници во Европа Лигата, екипи што ќе имаат една недела за да се одморат од мечевите во Премиерлигата и потоа од 2. август да продолжат во второто по квалитет европско клупско натпреварување.
Лигата на шампионите ќе се игра од 7. август, а ќе заврши со финалето во Истанбул на 29. август. Европа Лигата ќе се доигра од 2. август до 27. истиот месец за кога е планирано финалето во Гданск.
