Напаѓачот на Баерн Минхен и на репрезентацијата на Англија, Хари Кејн, верува дека има добри шанси да ја освои Златната топка за сезоната 2025/26.
Кејн ја освои Златната копачка откако постигна 32 гола во германското првенство. Тој даде дури 61 гол во сите натпреварувања и стана третиот играч по Лионел Меси и Кристијано Роналдо кој ја надминал границата од 60 погодоци.
„Ако погледнете кој се смета за фаворит за Златната топка во моментов, тука сме Олисе, јас и играчи кои стигнаа до финалето на Лигата на шампионите. Но, јас не сум еден од оние коишто велат дека ја заслужуваат Златната топка. Се обидувам да дозволам моите перформанси на теренот да зборуваат сами за себе. Слушнав дека церемонијата ќе се одржи во Лондон оваа година. Можеби тоа е добар знак за мене. Да ја добијам наградата во градот каде што сум роден би било уште поспецијално. Дефинитивно би бил меѓу фаворитите. Со оглед на трофеите што ги освоив оваа сезона и бројот на голови што ги постигнав, би бил меѓу кандидатите. Особено ако Англија го освои Светското првенство, се чини веројатно дека наградата ќе му припадне на англиски играч“, рече Кејн во интервју за „Л’Екип“.
