Лекарите му дијагностицираа рак на поранешниот шкотски фудбалер и една од најголемите легенди на Ливерпул, Кени Далглиш (75).
„Нашата љубов и поддршка се со вас, сер Кени“, се вели во соопштението на Црвените.
Далглиш, кој беше прогласен за витез за своите заслуги, имаше истакната кариера. Како играч, тој се прослави со Селтик и Ливерпул, каде што освои бројни трофеи, вклучувајќи три Европски купа. Како менаџер, тој го предводеше Ливерпул до три титули во англиската лига и сензационално ја освои Премиер лигата со Блекбурн во сезоната 1994/95.
Тој одигра 102 меѓународни натпревари за Шкотска, што е рекорд. Го дели првото место со Денис Ло меѓу најдобрите стрелци на сите времиња во националниот тим (имаат по 30 гола). Иконата на Мерсисајд ја сподели веста на социјалните мрежи откако ненамерно ја објави информацијата јавно.
Во својот карактеристично искрен и малку хумористичен стил, тој ја даде следната изјава:
„За разлика од моите вештини за користење мобилен телефон, моето лекување напредува добро. Како што беше јасно од мојата ненамерна објава на социјалните мрежи, моментно сум на лекување од рак. Идеално, ова би останало приватна работа, како што треба да биде, но моите бескорисни технолошки вештини го открија тоа. Немав намера да ја објавам оваа тема јавно, па би бил благодарен доколку се почитуваше приватноста на моето семејство и мојата лична приватност. Му благодарам на прекрасниот медицински персонал кој покажа неверојатна грижа и дискреција – не само кон мене, туку и кон многу, многу други пациенти“, порача Далглиш.
Ливерпул веднаш ја изрази својата безрезервна поддршка за легендарната фигура. Ова е втор шок за Ливерпул во два дена откако вчера и Кевин Киген откри дека се бори со рак ,и тоа во четврти стадиум.
