Македонската фудбалска репрезентација има само 13,1 отсто шанси да заврши на второто место во групата од квалификациите за пласман на Светското првенство во Катар. Ова е пресметката која ја направија „We Global Football“ по комплетирање на осум од десетте кола во квалификациите.
Според тие калкулации, Германија веќе обезбеди место на завршницата на планетарниот собир, а Романија има 84 отсто шанси да заврши како втора во групата. На Македонија ѝ се даваат 13,1 отсто, додека Ерменија е со 2,9 отсто шанси да биде втора и да игра во баражот.
До крајот на групата, Романија дома игра со Исланд, а во последното коло гостува кај Лихтенштајн. Македонија игра на гости кај Ерменија, а потоа го пречекува Исланд. Според сегашната бодовна ситуација, Романија е втора со 13 бодови, Македонија има 12, а Ерменија освои 11 бода досега.
Освен калкулациите за нашата група, направена е пресметка и за сите останати селекции кои се дел од квалификациите. Германија и Данска се единствените две селекции кои и теоретски обезбедија место на СП, а компјутерот вели дека 100 отсто таму директно ќе се пласитаат и Англија и Белгија. Со огромни шанси да се први во своите групи се и Франција (99,5 отсто), Португалија (86,7 отсто), Холандија (81,8) и Италија со 74,7 отсто шанси да бидат први во својата група. Полска, Шкотска, Србија и Швајцарија, треба да бидат сигурни во баражот.
Вкупно уште 28 европски селекции имаат некакви шанси да бидат дел од Мундијалот, а најмали се шансите на Албанија само со 0,4 отсто. Ноемвриските квалификации ќе ги дадат сите дилеми околу директните патници на Мундијалот во Катар и оние кои ќе играат во баражите.
