Женската фудбалска репрезентација на Македонија конечно забележа победа по пауза од речиси една година, а вечерва убедливо ја поразија селекцијата на Летонија во Рига со 4:1.
Капитенот Наташа Андонова ги предводеше девојките до прв триумф во Д групата за настап на Светското првенство.
Фудбалерката на шпанскиот Леванте даде два гола, а по еднаш во листата на стрелците се запишаа Гентјана Рочи и Улза Максути.
Македонија почна одлично и Рочи веќе во шестата минута ни донесе предност од 1:0 во Рига. Андонова зголеми на два гола разлика за Македонија во 28-мата минута, а домашната селекција намали на 1:2 со голот на Баличева само 120 секунди подоцна.
Гостинската репрезентација беше подобра и со головите на Максути и на Андонова од пенал во второто полувреме успеа да оствари убедлива победа.
Со тоа прекината е серијата од шест порази по ред и освоени се првите бодови во Д групата за настап на следниот Мундијал.
Следниот меч го играме дома, против Луксембург, за пет дена во рамките на четвртото коло.
