Шпанското првенство почнува утре, но Барселона доби дополнителни четири недели за доведување на засилувања. Новиот тренер Роналд Куман сака да доведе неколку нови играчи, а на списокот кој го упатил до челниците на клубот имало четири имиња како приоритет.
Прв на листата е напаѓачот на Лион, Мемфис Депај, кој блеска во францускиот тим. Кога се работи за холандски тренер, нормално е да има и холански фудбалери на листата на желби. Тука се Џорџинио Вајналдум од Ливерпул и стоперот Стефан де Вриј од Интер. Четврти на листата е Ерик Гарсија од Манчестер сити.
Депај и Вајналдум веќе подолго време се споменуваат како можни засилувања за Барселона. Двајцата имаат само уште една година од договорите со актуелните клубови и многу лесно може да бидат продадени. И Гарсија е реално засилување, но за Де Вриј ќе биде тешко изводливо да се пресели на „Камп Ноу“.
Летово единствено засилување на Барселона е Миралем Пјаниќ кој дојде во каталонскиот гигант од Јувентус, додека на спротивната страна замина Артур. Од тимот си замина и Иван Ракитиќ, кој се врати во Севилја. Барселона во овој момент има 37 играчи кои може да бидат дел од првиот тим.
