Македонија со втор нокдаун на СП: Нов двоцифрен пораз, овојпат добивме лекција од Холандија

Македонија претрпе втор убедлив пораз на Светското првенство во Полска, откако загуби од Холандија со 24:34. По овој пораз, Македонија останува без бодови, со негативна гол разлика од дури 22 погодоци. Шансата за пласман во втората фаза останува, треба да се победи Аргентина во последното коло, селекција која реално не е со ист квалитет како што се Норвешка и Холандија.

Македонија добро го отвори дуелот и прва даде гол. Потоа водевме и со 2:1 и 3:2 кога Манасков даде гол, а Холандија доби исклучување од две минути. И тогаш, наместо да продолжиме со добра игра, плус со играч повеќе на теренот, се случи спротивното.

Холандија со серија од 5:0 стигна до предност од 7:3 во 10 минута и тоа беше знак селекторот Кирил Лазаров да побара тајм аут. Следуваше погодок на Манасков од пенал за прекин на серијата на противникот.

Сепак, Холандија ја заврша предноста од четири гола најмногу благодарение на Каи Смитс кој даде пет гола во првите 15 минути кога Лалињата водеа со 9:5. Следуваа неколку добри минути на Македонија и со низа од 3:1 стигна до два разлика (8:10) во 18 минута, а потоа беше и 9:11.

За жал, по тајмаутот на Холандија, ривалот повторно влезе во добра серија и со серија од 4:0 прв пат стигна и до шест гола предност 15:9 во 25 минута, а на полувреме заминаа до предност од седум разлика.

Почетокотна второто полувреме беше добро за Македонија, па во првите 10 минути дадовме шест, а примивме само три гола и резултатот беше 17:21, па и 18:22. Потоа исклучен беше Талески, Македонија се обиде во нападот да игра со играч плус и да остави „празна мрежа“, што брзите Холанѓани максимално го искористија и постигнаа три погодоци на наша „празна мрежа“, па во 45 минута резултатот беше 26:18, а на пет минути пред крајот, ривалот водеше со 31:22, а на крајот резултатот беше победа со двоцифрена разлика за Холандија.

Кај Македонија најпрецизни беа Кузмановски и Пешевски со по четири гола , Костески и Манасков погодија по три пати, а потоа следуваа Талески со два гола, Атанасијевиќ 2, Серафимов 2 и по еден гол на Ѓорѓиев, Стојковиќ, Марковски и Гоеоргиевски. Кај Холандија, најпрецизен беше Смитс со 10 гола, а Бијенс даде 7.

- Оглас -

Најнови вести