Петтиот носител на турнирот, Данил Медведев од Русија, се пласира во осминафиналето на Отвореното првенство на САД во тенис во машка конкуренција. Медведев го елиминираше Флавио Коболи од Италија со резултат од 6:3, 6:4, 6:3, а мечот траеше два часа и 18 минути.
Следниот противник на Русинот ќе биде Нуно Боржес од Португалија, кој имаше сериозни потешкотии против Јакуб Меншик од Чешка и славеше во пет сета, 6:7 (5), 6:1, 3:6, 7:6 (6), 6:0. Португалецот имаше потреба од речиси четири часа за да го совлада 19-годишниот чешки тенисер.
Томи Пол го елиминираше Габриел Диало од Канада со 6:7 (5), 6:3, 6:1, 7:6 (3). Четиринаесеттиот носител ќе игра во осминафиналето против светскиот рекет број 1, Јаник Синер од Италија.
Двајца Австралијци исто така се пласираа во следната фаза и ќе играат еден против друг. Десеттиот носител, Алекс Де Минор, го победи Даниел Еванс со 6:3, 6:7 (4), 6:0, 6:0, додека искусниот Џордан Томсон се справи со Матео Арналди од Италија со 7:5, 6:2, 7:6 (5).
