По петтото коло што заврши вечерва познати се 11 од вкупно 16 осминафиналисти во Лигата на шампионите, а испадна една екипа што има титулa во елитното натпреварување.
Жуниор Месијас му донесе спас на Милан и победа во Мадрид со 1:0 против Атлетико, со која Росонерите остануваат во игра за пласман во осминафиналето во ЛШ.
Голот за победа на Милан во 87-мата минута можете да го погледнете ОВДЕ.
Ливерпул го победи Порто со 2:0 и имаат максимални 15 бода, а разврската во групата за второто место ќе биде интересна.
Порто има пет бода и ќе му биде домаќин на Атлетико, кој има четири бода како и Милан, кој му е домаќин на Ливерпул во последното коло.
Со фазата по групи од настап понатаму во Лигата на шампионите вечерва се прости Борусија Дортмунд.
Милионерите загубија со 3:1 во Лисабон од Спортинг што ги елиминира уште во фазата по групи.
Педро Гонкалвеш со два гола и Поро со еден погодок го декласираа германскиот тим.
Од таа Ц група, со Лавовите од Лисабон во нокаут-фазата оди и Ајакс со 15 бода на пет меча.
Во дербито на петтото коло Манчестер сити со головите на Стерлинг и Жезус направи пресврт и со 2:1 го победи Пари Сен Жермен, а и двете екипи одат понатаму благодарение на победата на Лајпциг против Бриж со 5:0.
Во осминафиналето се и Реал Мадрид и Интер по победите против Шериф и Шахтар. Интер славеше со 2:0 со двата гола на Един Џеко против Шахтар и потоа си дочека победа на Кралскиот клуб од 3:0 во Тираспол против Шериф за да биде сигурен патник во осминафиналето.
Досега во осминафиналето пласман обезбедија: Манчестер сити, ПСЖ, Ливерпул, Ајакс, Спортинг, Реал Мадрид, Интер, Баерн, Манчестер јунајтед, Челзи и Јувентус.