Борусија Дортмунд е новиот освојувач на пехарот во Германскиот куп по победата од 4:1 против Лајпциг вечерва во финалето во Берлин.
Милионерите по вторпат за пет дена ги победија Биковите, сега во многу поважниот меч што им го донесе и петтиот трофеј во клупската историја во популарниот ДФБ покал.
По триумфот минатиот викенд со 3:2 во меч од Бундеслигата, сега Борусија беше поубедлива и славеше голема победа од 4:1.
Џејдон Санчо со гол во петтата минута најави каде ќе патува пехарот во десеттото финале во Купот што го играше Борусија Дортмунд.
Со извонредна соло-акција во 28-мата минута, Ерлинг Халанд им донесе предност од 2:0 на новите победници во Германскиот куп, а сè беше решено со вториот гол на Санчо во судиското продолжение од првото полувреме.
https://twitter.com/VBETnews/status/1392931394788134913?s=20
Лајпциг одигра подобро во вториот дел, но стигна само до почесен гол што го постигна Дани Олмо, а потоа Халанд со вториот гол на мечот ги постави конечните 4:1 за Борусија.
Градот Лајпциг чека куп-титула од 1936 година, кога единствениот пехар го донесе ВФБ Лајпциг со победа против Шалке 04 во второто издание на најмасовното натпреварување во Германија.
