Бојан Миовски ги постигна првите голови за Македонија, двапати беше стрелец против Гибралтар и вели дека е горд и дека нашиот национален тим ќе се бори за првото место во групата се додека има и теоретски шанси за подвиг.
„Имаше лоша почетна подлога за мечот по поразот од Грузија, но иако е Гибралтар, победата од 4:0 ни значи многу. Секако сум радосен и горд што постигнав два гола во дресот со националните обележја и од тоа нема поубав момент во фудбалската кариера. Ќе се бориме докрај, се додека има и теоретски шанси за првото место во нашата група“, изјави Миовски.
Тој доби шанса да биде стартер и постигна два гола, а на Македонија сега и треба подвиг во Грузија, на 23. септември и победа од четири гола разлика за да атакува на триумф против Бугарија три дена подоцна и сигурно да биде прва во четвртата група од Ц сегментот што би значело и промоција во повисок ранг во Лигата на Нации.
