Фудбалската репрезентација на Македонија денес ќе одигра пријателски натпревар против селекцијата на Фарски Острови. Натпревар на кој селекторот Благоја Милевски ќе може да ги види и фудбалерите кои и не се толку стандардни во репрезентација, но сепак нема да комбинира премногу бидејќи и пријателските натпревари се значајни и се бројат за подобар пласман на ФИФА ранг-листата.
Стандарниот Столе Димитриевски не е во комбинација за денешниот натпревар, па се очекува Дамјан Шишковски да застане на нашиот гол. Тројката пред неговиот гол ќе ја сочинуваат Велковски, Ристевски и Бејтулаи. Крилните позиции се резервирани за капитенот Ристовски и Алиоски. Во средината на теренот се очекува да започнат Атанасов, Барди и Елмас, додека во нападот е Чурлинов, кој внесе свежина против Малта и Нестороски.
Гостинскиот селектор Хакан Ериксон ќе започне со класична 4-4-2 формација. На голот со Лахмау, а во одбранбената линија Соренсен, Ватнамер, Фаеро и капитенот Давидсен. Средината на теренот се очекува да биде „густа“ со Олсен, Андресен, Мнени и Микелсен. Најголема опасност по нашиот гол ќе претставуваат Јохансен и Клетскард.
Натпреварот започнува во 18 часот на Националната арена „Тодор Проески“ во Скопје.