Европското првенство на кое Италија беше крунисана во нов континентален владетел донесе многу возбудувања, многу интересни мечеви кои мораа да се решаваат по регуларните 90 минути. Дури осум од 15-те мечеви во нокаут-фазата завршија нерешено, па мораа да се играат дополнителни 30 минути, а на четири победникот се решаваше во пенал-рулетот.
Дури и финалето беше решено на пенали откако мечот заврши 1:1, а Аѕурите во пенал-серијата победија со 3:2. Иако беше многу возбудливо и драматично, сепак финалето не е најдобриот меч кој се одигра на ЕП. Ова признание за најдобар меч на континенталниот турнир замина за средбата која ја одиграа Хрватска и Шпанија во осминафиналето.
Хрватска поведе со 1:0 по автоголот на Педри, а Шпанија до полувремето израмни со голот на Сарабија. Аспиликуета и Торес погодуваа за Шпанија за водство од 3:1 во 77-мата минута. Иако делуваше дека Црвената фурија е сигурен патник во четвртфиналето, Хрватска не се предаде и со фуриозен финиш и головите на Оршиќ и Пашалиќ стигнаа до 3:3 во 90+2 минута.
Мораше да се играат дополнителни 30 минути во кои Шпанците одиграа одлично. Мората и Ојарзабал погодија за 5:3, а Коцкестите повеќе немаа сила за ново враќање. Осумте гола и многуте драматични пресврти беа доволни за овој меч да биде прогласен за најдобар на ЕП 2020.