Ракометната репрезентација на Македонија ја одигра првата од четирите контролни средби пред стартот на Европското првенство.
Нашата селекција во Маврово славеше над Кувајт со убедливи 31:21.
Селекторот Кире Лазаров им даде шанса на сите ракометари коишто се на подготовките, а убедливата победа дојде благодарение на одличното второ полувреме.
Во првиот дел Кире пробуваше најразлични варијанти и тактики, па затоа го завршивме само со предност од еден гол (14:13).
Но, во второто полувреме одбраната заигра на едно повисоко ниво, па Кувајт својот прв гол во продолжението го постигна дури во 43-тата минута.
Предноста продолжуваше да расте, па така се дојде до конечните 31:21.
Младиот Мартин Серафимов блесна со седум погодоци, а зад него следуваше Филип Талески со пет.
На голот, пак, Мартин Томовски имаше шест, додека Марко Кизиќ запиша пет одбрани.
Нашата селекција за два дена ќе биде комплетна и ќе продолжи со подготовките во максимален состав.