Оукли Каноние беше еден од хероите на Ливерпул во епскиот меч на англискиот клуб против Барселона, кога Црвените на „Енфилд роуд“ со фантастичен настап победија со 4:0 во полуфиналето на Лигата на шампионите и ја анулираа негативата од 0:3, а потоа и ја освоија европската круна.
Каноние тогаш како 15-годишно момче задолжено да ги враќа топките реагираше молскавично и експресно му ја даде топката на Трент Александер-Арнолд за да изведе корнер, по кој Дивок Ориги го постигна толку посакуваниот гол за 4:0 и елиминација на Барселона.
Потоа во финалето на ЛШ, Ливерпул го победи Тотенхем со 2:0 на „Ванда Метрополитано“ во Мадрид и ја освои шестата европска круна.
Денеска 17-годишниот Каноние потпиша прв професионален договор со својот омилен клуб Ливерпул, а навивачите и играчите на Црвените вечно ќе ја паметат брзата реакција на тогашното момче задолжено за враќање на топките, од денеска веќе и професионален фудбалер на клубот.
