Кеј Нишикори продолжи во своите маратонски победи на Ролан Гарос откако денес го елиминира Карен Хачанов во пет сета со 4-6, 6-2, 2-6, 6-4 и 6-4 за пласман во третото коло на Отвореното првенство во Франција.
Јапонецот во првиот ден од гренслем-турнирот исто така се мачеше во четиричасовен дуел против Џанеси, а сега се вадеше од негатива при 1-2 во сетови против рускиот тенисер, кој е за 14 позиции подобар од Нишикори на АТП-листата.
Во фанстастичниот пресврт на Нишикори му тргна во четвртиот сет, кога Хачанов дојде до нов брејк, а Јапонецот возврати со два украдени сервиси, од кои вториот му послужи да го освои сетот со 6-4. Во решавачкиот сет двајцата беа трпеливи до 10-тиот гем, во кој Нишикори без загубен поен дојде до брејк искористувајќи ја првата меч-топка за победа.
Во следното коло најдобриот машки јапонски тенисер ќе се соочи со 159-торангираниот Хенри Лаксонен.
