Олимпијакос стана само 10-тиот тим кој финале во европски куп ќе игра во својот град

Олимпијакос направи подвиг откако се пласира во финалето на Лигата на конференции. Во полуфиналната двојна пресметка со англискиот премиерлигаш Астон вила, тимот од Атина беше убедлив и по 180 минути игра славеше со убедливи 6:2.

За Олимпијакос ова ќе биде прво финале во некој од европските купови. Дополнителен предизвик за Олимпијакос е тоа што финалето ќе се игра на 29 мај во Атина, на стадионот „Агија Софија“, кој е дом на тимот на АЕК. Иако Олимпијакос нема да игра на својот „Спирос Луис“, сепак фактот дека играат во својот град е доволно да се чувствуваат како домаќини против Фиорентина.

Во историјата на европските купови на УЕФА досега само деветпати се случило финалист да игра во својот град, а сега Олимпијакос е јубилеен 10-ти клуб со таква можност. Реал Мадрид во 1957 година во финалето на КЕШ (Лига на шампиони) победи на „Сантијаго Бернабеу“, а во елитното натпреварување тоа се случило уште трипати. Во 1965 година Интер играше во Милано против Бенфика и славеше титула.

Во 1984 година Рома играше на „Олимпико“ против Ливерпул, а англискиот тим победи на пенали. Слично беше сценариото и во 2012 година година, кога Баерн Минхен на „Алијанц арената“ играше против Челзи, а англискиот тим победи на пенали.

Во Купот на УЕФА, односно Лигата на Европа, Феенорд во Ротердам играше финале против Борусија Дортмунд и победи со 3:2. Потоа, во 2005 година Спортинг во Лисабон загуби во финалето од ЦСКА Москва со 1:3.

Во Купот на купот на победниците, кој веќе не постои, Вест хем во Лондон го победи Минхен 1860 со 2:0 во финалето играно во 1965 година. Во 1976 година Андерлехт го победи Вест хем на „Хејсел“ во Брисел со 4:2, а во 1982 година Барселона на „Камп ноу“ со 2:1 во финалето се радуваше над Стандард Лиеж.

Сега е ред Грците во Атина да имаат свој преставник во финалето.

ПОВРЗАНИ ВЕСТИ

ОСТАВИ КОМЕНТАР

Внесете го вашиот коментар!
Внесете го вашето име тука

- Оглас -

Најнови вести