Дома Blog Страница 10599

Ситна е повредата на Мертенс

Томас Ѓорѓиевски
-
0

Напаѓачот на Наполи, Дрис Мертенс, вчера претрпе повреда на рамото во текот на мечот против ПСЖ. Белгиецот кон крајот на средбата мораше да го напушти теренот поради болки, но по денешните прегледи, потврдено е дека се работи за нарушување на ротаторната манжетна на рамото.

Тоа значи дека Мертенс ќе мирува само два или три дена, но ќе биде на располагање кај Карло Анчелоти за претстојниот меч против Џенова во Серија А викендов.

По вчерашното реми од 1-1 против ПСЖ, Наполи во сабота продолжува со обврските во Серија А. Му следува меч на гости кај Џенова на нашиот Горан Пандев, во обид да остане при врвот и да го следи чекорот со Јуве и по 12 одиграни натпревари во италијанскиот шампионат.

Галакси е приоритет на Ибрахимовиќ

Томас Ѓорѓиевски
-
0

Златан Ибрахимовиќ би можелo да остане во САД, поточно во Лос Анџелес, каде што настапува за тимот на Галакси, и покрај интересот од неколку европски клубови. На Швеѓанецот му е приоритет да остане во клубот, потпиша кон почетокот на 2018 година, особено ако раководстовото му исполни неколку негови желби.

„Постои интерес за мене од Европа, тоа не е тајна. Но, јас сакам да останам во ЛА, среќен сум тука. Интерес од други клубови секогаш ќе има, не беше изненадување кога ме бараа и кога бев повреден, па не е ни сега. Јас сум играч на Галакси, засега се фокусирам само на нив“, истакна Златан за американските медиуми.

Се шпекулира дека Ибрахимовиќ ѝ поставил неколку услови на управата на клубот од МЛС за да остане подолг период во Градот на Ангелите, па во следниот период ќе се знае дали неговите желби ќе бидат исполнети. Се зборува и за кратка позајмица во Европа, бидејќи Галакси моментално нема фудбалски обврски, откако рано заврши нивното патешествие во разигрувањата на плејофот. Пред неколку дена беше најавено дека постигнал вербален договор за враќање во редовите на Милан, но засега нема поконкретни информации околу тој евентуален трансфер.

Во 27 настапи во МЛС-лигата, Ибрахимовиќ постигна 22 погодоци и запиша шест асистенции.

Нејмар: Судијата воопшто не нѐ почитуваше

Томас Ѓорѓиевски
-
0

Фрустрацијата беше очиледна кај Нејмар на вчерашната средба против Наполи. Во неколку наврати не се согласуваше со одлуките на судијата Кујперс, а кон крајот на мечот, при еден негов протест, заработи жолт картон. Бразилецот не ги смири страстите по мечот и апелираше до УЕФА да реагира и да го заштити.

„Не ме засега што судиите можат да погрешат повеќе пати на еден натпревар. Ме иритираше начинот на кој се однесуваше со нас, не покажа ниту малку почитување. Го осудувам однесувањето на судијата, ми кажа нешто што не требаше, се надевам дека одговорните преземат мерки“, истакна Нејмар.

ПСЖ од Неапол се врати со еден освоен бод, а по четири натпревари во групата Ц, Ливерпул и Наполи ја делата првата позиција со по шест бода. Пет имаат „светците“, а четири бода има Ѕвезда по вчерашната сензационална победа над „црвените“ од Мерсисајд.

ЛА Лејкерс се засили со ветеранот Чендлер

Томас Ѓорѓиевски
-
0

Лос Анџелес лејкерс го потврди ангажманот на Тајсон Чендлер, кој ќе остане во редовите на „езерџиите“ до крајот на сезоната. Неговиот договор е во вредност од два милиони долари, а тој доаѓа да биде поддршка за центарските позиции.

Искусниот центар пред неколку дена стана слободен агент откако со Феникс санс се согласија да го раскинат договорот.

„По 10 одиграни мечеви во новата сезона, на младиот тим на Лејкерс му беше потребно искуство, а го пронајдовме токму во Чендлер. Тој е долго време во оваа лига, има неизмерно искуство, како и шампионски прстен, па јасно е дека очекуваме неговиот авторитет да биде добар за екипата. Исто така, ќе бидеме поцврсти во одбраната, сегмент кој мора да го подобриме во следниот период“, истакна генералниот менаџер на тимот, Роб Пелинка.

Чендлер ќе ја игра 18-тата сезона во својата кариера. Во 2011 година со тимот на Далас маверикс стана шампион на НБА, една година подоцна, на ОИ во Лондон со тимот на САД го освои и златниот медал. Во 2012 година, исто така, беше избран за најдобар дефанзивец во НБА-лигата.

МЗТ не се залажува со последното место на Вршац

Златко Јуруковски
-
0

Екипата на МЗТ Скопје Аеродром против Вршац од 18 часот ќе се обиде да ја извојува првата гостинска победа во втората АБА-лига, но иако македонскиот тим е фаворит на хартија, тоа не мора ништо да значи. „Штрковите“ еднаш веќе се „изгореа“, кога гостуваа кај Зрињски, кој немаше ниту една победа дотогаш, но одигра одлично и го совлада МЗТ.

Вршац има само една победа, но според гостите од Скопје, мечот ќе биде тежок.

„Пред нас е исклучително тежок меч. Вршац има квалитетни кошаркари кои во ниту еден момент не смеат да се потценат. Проблем за нас е отсуството на Иве Иванов, кој се повреди против Сплит, ќе ни треба решителност и храброст“, изјави тренерот Ѓорѓи Кочов.

 

Ѓоковиќ му посака побрзо закрепнување на Надал

Златко Јуруковски
-
0

Рафаел Надал имаше болки во стомачните мускули, плус и операција на зглобот на десната нога во Барселона, па нема да може да игра на завршниот турнир во Лондон, а со тоа на Новак Ѓоковиќ му е загарантирано првото место на АТП-листата на крајот од сезонава. Србинот е ривал со Надал на терен, но надвор од него се пријатели и на колегата му посака што побрзо да се врати.

„На мојот пријател му ги испраќам моите најдобри желби, со надеж за брзо закрепнување по операцијата“, напиша Србинот на Твитер.

Надал излезе од болница, а шпанските медиуми објавија фотографија.

Ѓоковиќ и Надал на официјален мечеден против друг би можеле  да играат најрано на Отвореното првенство на Австралија во јануари, а постои можност да си ги одмерат силите и на егзибициски меч во Саудиска Арабија на 22-ри декември, но тоа ќе зависи од тоа дали рехабилитацијата на Надал ќе оди добро.

Победа е кошмар за Шкендија, славеше и во Купот

Трајан Маневски
-
0

Прилепска Победа се претвора во вистински кошмар за Шкендија. Македонскиот првак вторпат за помалку од два месеци е поразен на свој терен во Тетово од Победа. Откако на 26-ти септември Победа се радуваше со 2-0 во првенствен меч, попладнево прилепчани минимално со 1-0 победија на гости во првиот меч од четврт-финалето Купот на Македонија.

Камерунскиот напаѓач Јаник Макота е човекот кој ѝ донесе победа на Победа, откако погоди уште во 19-тата минута. До крајот на средбата, тетовци се обидуваа да израмнат, но не успеаја. Ако се знае дека Победа се радуваше против Шкендија и на дуелот одигран во април оваа година, прилепчани успеаја да наредат три победи во низа против шампионот и се поблиску до полуфиналето.

Македонија Ѓорче Петров се врати на победите без примен гол на свој терен. Бразилецот Робсон да Силва погоди во 48-мата минута и тоа беше доволно „лавовите“ да слават со 1-0 пред реваншот на теренот на „романтичарите“.

Победи во првите мечеви од четврт-финалето остварија и двете струмички екипи. Академија Пандев со 3-1 го победи второлигашот Кораб, додека Беласица успеа да слави на гостувањето кај Силекс со 2-0 и на тој начин да биде многу блиску до влез меѓу најдобрите четири екипи во Купот.

Реванш-дуелите од четврт-финалето се закажани за петти декември, кога ќе бидат познати и екипите кои ќе обезбедат место во полуфиналето.

 

На Металург му се насмевнува втора победа во СЕХА

Златко Јуруковски
-
0

Металург во осмото коло на СЕХА-лигата има убава прилика да дојде до втората победа, бидејќи романска Стеауа Букурешт допатува ослабена и само со 10 здрави играчи. Утре за „металурзите“ претстои нов меч, против Спортинг Лисабон од Лигата на шампионите.

Тренерот на Металург, Данило Брестовац, првпат во кариерата се соочува со ситуација да подготвува тим за два меча по ред.

„Имам ретка можност да подготвувам два натпревари по ред во два дена. Досега не сум имал вакво искуство. Има најава дека Стеауа ќе игра со втор тим. Овој меч ќе ни послужи за искуство на младите играчи. Ако Романците настапат во најсилен состав, тоа ќе биде добар натпревар за нас. Ако одиграме на високо ниво, би требало да ја продолжиме серијата победи, но шансите се 50-50“, рече Брестовац.

Натпреварот помеѓу Металург и Стеауа се игра во СЦ „Борис Трајковски“, со почеток во 17.15 часот.

Венгер објасни што е вистината поврзана со Милан

Трајан Маневски
-
0

Францускиот стратег Арсен Венгер ги демантираше најавите дека потпишал договор со Милан, но најави дека на почетокот на следната година ќе најде ангажман.

„Ме праќаат секаде низ светот, а тоа е така бидејќи немам работа. Немојте да ги слушате трачевите. Јас ќе работам од следната година, но искрено засега не знам каде. Да знаев, ќе ви кажев, но засега нема ништо“, рече Венгер, кој посебно ги објасни шпекулациите дека ќе биде тренер на Милан. „Можам да ви кажам дека пишувањата дека ќе бидам тренер на Милан се лажни. Не постои никаков договор со Милан“, објасни Венгер.

Легендарниот француски тренер цели 22 години беше на чело на Арсенал, а на крајот од минатата сезона реши да си оди од „топчиите“. Милан, ПСЖ и уште неколку клубови беа поврзувани со Венгер, но засега самиот тренер вели дека нема договор со ниту еден тим.

 

Реал во 2017 година нудел 214 милиони за Мбапе

Златко Јуруковски
-
0

Во летото 2017 година, Монако прифатил понуда од Реал Мадрид вредна 180 милиони евра, плус 34 за данок, и сето тоа за младиот Килијан Мбапе, но тој ја одби понудата. ПСЖ имал иста таква понуда за обесштетување, но разликата била во платата.

Таткото на Мбапе побарал од Флорентино Перес на неговиот син да му се исплаќаат по 30 милиони евра годишно, и тоа било неприфтливо за Кралскиот клуб. Мбапе можел и да остане во Монако ако добие плата од 8 милиони, што било за 16 пати поголема од неговата дотогашна годишна заработувачка.

Париските „светци“ прифатиле некои од условите на Мбапе, а се шпекулира дека клубот не го почитувал финансискиот фер плеј и има работи кои не се познати за јавноста. Официјално, Мбапе има договор од 10 милиони по сезона.

1...10.59810.59910.600...10.806Страна 10.599 од 10.806