Дома Blog Страница 10621

Новиот тренер на Партизан ќе зема поголема плата од играчите

Златко Јуруковски
-
0

Италијнскиот стручњак Андреа Тринкиери е новиот тренер на кошаркарскиот клуб Партизан, а според „Блиц“, договорот ќе биде со траење од три години и Тринкиери ќе зема плата од 33.000 евра месечно.

Помошник на Тринкиери ќе му биде Црногорецот Владо Шќепановиќ. Некогашниот играч на Партизан нема да му биде во улога на преведувач, бидејќи мајката на Тринкиери е Хрватка, баба му е Црногорка, и тој одлично го говори јазикот, туку Шќепановиќ ќе биде вистински асистент.

Прва задача ќе му биде да ја скаутира играта на Мега Бемакс, кој е прв ривал на Партизан во АБА-лигата. На таа средба в сабота, Тринкиери ќе го има дебито, а вечерва „црно-белите“ играат меч од Еврокупот.

Договорот уште не е официјално објавен, но Тринкиери на својот профил на „Твитер“ стави слика со грбот на белградскиот клуб.

Не е исклучено на СП 2022 во Катар да играат 48 тима

Златко Јуруковски
-
0

Светското првенство во фудбал ќе се прошири од 32 на 48 учесници, но наместо во планираната 2026 година, тоа може да се случи уште на наредниот Мундијал, во Катар 2022 година. Доколку се случи ова, тогаш Катар нема да биде сам организатор на првенството, туку ќе треба да се уфрли уште некоја од неговите соседи земји.

СП 2026 ќе се игра во САД, Мексико и Канада, Светската фудбалска асоцијација одлучи таму да биде првото проширено светско првенство, но сега претседателот на ФИФА, Џани Инфантино, кажува нешто друго.

„Ако е можно, зошто да не? Ќе видиме дали е можно. Разговараме со нашите катарски пријатели и со другите од регионот, па се надевам на успешен исход. Ако не успееме, барем ќе знаеме дека сме се обиделе“, рече Инфантино.

Инфантино сака проширување и на клупското СП, идејата е тоа да биде „вистинско натпреварување достапно за сите клубови на светот“.

Белодедиќ открива како се местат натпревари

Трајан Маневски
-
0

Легендарниот романски дефанзивец Миодраг Белодедиќ реши јавно да открие дека учествувал во два наместени меча и како се прави тоа да изгледа незабележливо за гледачите. Белодедиќ два пати беше европски првак. Еднаш со Стеауа, а еднаш и со Црвена ѕвезда. Кога играше во Црвена ѕвезда, тој беше соиграч на Дарко Панчев и Илија Најдовски.

Белодедиќ вели дека додека играл за Стеауа, морал да игра на два меча кои биле наместени и морале да завршат нерешено. Тој дури и објаснува на кој начин играчите се однесуваат за да изгледа како мечот да не е наместен, туку дека се борат и сакаат да победат.
„Мечот меѓу Стеауа и Клуж кој се играше пред многу години, мораше да заврши нерешено. Така беше и на мечот против Бистрица. Договорено беше да нема победник. Во таков случај, мечот започнува нормално. На почетокот се игра цврсто, не му дозволувате на противникот да даде гол. Се обидувате да дадете гол и ако успеете во тоа, тогаш му пуштате на противникот да израмни“, вели Белодедиќ.

Некогашниот романски фудбалер објаснува на кој начин се прави да му се дозволи на противникот да даде гол.

„Постојат многу начини на кои противникот може да даде гол. Кога е корнер, слободен удар… Едноставно не ги напаѓате нивните голгетери. Наместо да тргнете кон топката, вие чекате и чекате и чекате. Тогаш напаѓачот шутира, а вие само малку повеќе ја кревате ногата високо, за да може топката да помине. Навивачите така никогаш не може да сфатат дека мечот е наместен“, вели Белодедиќ.

Во текот на кариерата, Белодедиќ помина девет години во Стеауа, во ѕвезда беше три сезони, а има играно и за Валенсија, Вилјареал и Валјадолид.

 

МЗТ бара голема поддршка и хуманост од своите навивачи

Златко Јуруковски
-
0

Утрешниот натпревар (18 часот) помеѓу МЗТ Скопје Аеродром и Сплит од АБА 2 лигата ќе има и хуманитарен карактер, со тоа што сите присутни во салата ќе може да донираат средства за лекување во странство на Борче Цветановски.

Цветановски е татко на голем навивач на МЗТ и член на „Фемили“, а дијагностицирана му е ретката болест Амилоидоза, за која нема лек во Македонија. Влезот во салата ќе биде слободен, но ќе се постават кутии за донации и присутните ќе може да искажат хуманост и да помогнат за скапото лекување во странство.

„Наша цел е да победиме. Имаме противник со искусни поединци и не смееме да им дозволиме да наметнат нивен стил на игра, туку треба да бидеме агресивни од самиот почеток. Ако ги исполниме задачите и ако останеме доследни на планот од соблекувалната, убеден сум дека ќе дојдеме до двата бода“, најавува плејмејкерот Лестер Медфорд.

Тренерот на Сплит, некогашниот хрватски репрезентативец Владимир Анзуловиќ, потсети дека МЗТ лани играше во главната АБА-лига и има амбиции и голема желба да се врати во елитата. Добро му е познат и Хрватот Иве Иванов, кого го има тренирано две години, а некомплетни дојдоа во Скопје, па тешко ќе им биде против МЗТ.

Надал се откажа од Мастерсот, Ѓоковиќ е новиот број 1 на АТП

Златко Јуруковски
-
0

Рафаел Надал без борба му го препушти тронот на АТП-листата на Новак Ѓоковиќ. Шпанецот пред самиот почеток на натпреварот со Фернандо Вердаско, го откажа настапот на Мастерсот во Париз поради проблеми во абдоменот, па ќе загуби доста поени и тоа значи дека од понеделник, лидер на ранг-листата ќе биде Ѓоковиќ.

„Деновиве добро се чувствував, но почнав да имам стомачни болки. Лекарите ми препорачаа да не играм“, изјави тенисерот од Мајорка.

Ѓоковиќ точно по две години се враќа на челната позиција, а тој во Париз сега може да собира поени за да ја зголеми предноста пред Надал. Во второто коло, Ноле ќе се сретне со Босанецот Дамир Џумхур. Ѓоковиќ во минатото 122 недели по ред беше прв на АТП-листата, а ако го освои парискиот Мастерс, ќе се изедначи со Надал по бројот на мастерс трофеи.

Џенова бара да ѝ се додели Скудетото од 1925 година

Златко Јуруковски
-
0

Фудбалскиот клуб Џенова, чиј член е македонскиот капитен Горан Пандев, побара да му биде доделена титулата од пред 93 години, за која сметаат дека им е „украдена“. Со титулата од 1925 година, Џенова би имала десет Скудета, па ќе имаат право на дресот да си стават и ѕвездичка.

Претседателот на Џенова, Енрико Прециози, смета дека би било прекрасно кога Џенова би ставила ѕвездичка на дресот.

Во далечната 1925 година се случи еден од најголемите скандали во историјата на италијанскиот фудбал. Џенова во мајсторката (тогаш во плејоф-формат играле најдобриот тим од југот против најдобриот од северот на Италија) загуби од Болоња со 0-2, но заслуга за тоа има и фашистичката милиција, политиката, а имало и пукање кон возот со кој патувале фановите на Џенова.

Првите две средби завршиле со по 2-1 за двата тима. Тогаш немаше пенали, па се играл трети меч. Од Џенова тврдат дека не требало да се игра четврти меч бидејќи на третиот, кој завршил 2-2, судијата признал нелегален гол за Болоња (стрелец бил некој од публиката!!!). Жалбата им била одбиена бидејќи потпретседателот на Италијанската федерација бил близок со Бенито Мусолини и со клубот Болоња.

Дури во петтиот дуел, кој се играл на деветти август, во близина на Милано, во 7 часот наутро, Болоња славела со 2-0 и освоила титула.

Најдоброрангираниот македонски тенисер на операција во Москва?

Златко Јуруковски
-
0

Томислав Јотовски можеби ќе треба да биде изложен на операција на десното рамо доколку на снимките се потврди дека има скината тетива. Најдоброрангираниот македонски тенисер е во Москва и утре претпладне ќе се знае дали ќе биде опериран.

Јотовски неколку месеци мака мачи со рамото, на последните турнири играше со болки и под инјекции, но состојбата му се влоши за време на финалето од МТП опен турнирот во Скопје и мораше да го откаже настапот во Анталија.

Проблемот на Јотовски е тетивата на рамото и уште не е дефинитивно дали е само отечена или и скината. Рускиот специјалист утре ќе каже дали македонскиот рекет број 1 ќе мора да биде опериран како подолгорочно решение, но тоа би значело и подолга пауза од тениските активности.

Вардар не го дава врвот – Прв ја победи Македонија во Ѓорче Петров

Зоран Поповски
-
0

Дарко Мицевски и Јован Попзлатанов беа на вистинското место и погодија во финишот на локалното дерби, а Вардар прв ја победи Македонија во Ѓорче Петров.

Домаќините беа непоразени и на пет меча на својот стадион немаа примено гол, но серијата ја прекина Вилијан Соуза Лира со погодок за Вардар во 19-тата минута. Македонија израмни со погодокот на Боби Божиновски во 54-тата минута, но домаќините не издржаа докрај.

Мицевски беше прецизен за лидерот во 90-тата минута, а првиот пораз на Ѓорчепетровци на нивниот терен го потврди Попзлатанов во последните моменти.

Триумф со разлика од два гола забележа и шампионот Шкендија, во Струмица против Беласица. Емини во првиот дел и Тотре на почетокот на второто полувреме беа стрелци за победа од 2-0.

Идентична победа како Вардар, со 3-1 против Победа забележа Работнички. По лошото прво полувреме, во продолжението имаше дури 4 гола. Три од нив постигнаа домашните играчи, Шаркоски, Чинеду и Петковски, а почесниот за прилепчани беше дело на Нвабезе.

Шкупи со голот на Виктор Ангелов ги освои бодовите против Академија Пандев, а реми имаше во Тетово, на дуелот меѓу Ренова и Силекс. Гостите поведоа со голот на Алексовски, а израмни Стојановски.

Табела: Вардар 27, Шкендија 25, Академија Пандев 19, Работнички 17, Победа 14, Ренова, Македонија Ѓ.П. и Беласица по 13, Шкупи 12, Силекс 11.

Празник во Барселона: Меси се врати на тренинг

Трајан Маневски
-
0

Најдобриот играч на Барселона, Лионел Меси, повторно тренира. Капитенот на каталонскиот гигант заработи скршеница на лакотот на десната рака за време на мечот против Севилја на 20-ти октомври. Аргентинецот даде гол на овој меч, а Барселона победи со 4-2.

„Меси се врати на тренинг“, се пофалија од Барселона на нивната страница на „Фејсбук“.

Капитенот на Барселона сезонава има одиграно 12 мечеви, во кои има постигнато 12 погодоци, а има и шест асистенции.

Актуелниот шпански првак вечерва игра дуел од Купот на Шпанија против нисколигашот Културал Леонеса.

Шаркоски и Божиновски немаа милост за матичните клубови

Зоран Поповски
-
0

Никола Шаркоски немаше милост кон Победа, клубот што го промовираше во прволигашки играч и погоди за Работнички против прилепчани, а тоа го стори и Боби Божиновски.

Шаркоски играше за Победа, кога прилепчани беа второлигаши, беше меѓу најдобрите стрелци и учествуваше во промоцијата во Првата лига. По една сезона во највисок ранг на натпревари како фудбалер на Победа, се пресели во Работнички и денеска со голот во 50-тата минута на „романтичарите“ им донесе предност од 1-0  против својот поранешен клуб.

Речиси истовремено за Македонија Ѓ.П. против Вардар погоди и Боби Божиновски. Играчот од средниот ред израмни на 1-1 против својот матичен клуб. Кариерата ја почна во Вардар во 1999 година и има 73 настапи за најтрофејниот клуб.

1...10.62010.62110.622...10.802Страна 10.621 од 10.802