Без наслов - Страница 9583

Ќе го „откажеме“ Лихтенштајн уште во првото полувреме

Типстерски совети

-

13.10.2018

Ќе го „откажеме“ Лихтенштајн уште во првото полувреме

Дуелот на Македонија и Лихтенштајн треба да биде уште еден чекор кон првото место во групата од Лигата на нации, и тој меч треба да биде незаобиколен „декор“ на секое ливче кое денеска ќе се уплати во SPORT LIFE. Патриотски и навивачки е да се типува победа на Македонија, а има и разни комбинации кои може да се додадат покрај задолжителниот „кец“. Ви даваме уште четири предлози за денеска.

Македонија – Лихтенштајн (20.45 часот)

Пред една година, на 9 октомври, истиот овој противник од Струмица си замина поразен со 4:0, па и сега во Скопје би требало да има слично, или исто сценарио. На 25-годишнината од првиот меч, Пандев и другарите ќе сакаат да ги задоволат вкусовите на Панчев и генерацијата која во 1993 ја победи Словенија. Лихтенштајн го совлада Гибралтар, но нема што да бара на вечерашното гостување кај Македонија која во последните две години, има само три порази, од кои два од Шпанија и еден од Италија.

Предлог тип: 1-1 & 2-4 (2.45)

Холандија – Германија (20.45 часот)

„Лалињата“ цели 18 години не победиле дома против „панцерите“. Гостите се фаворити, но во последно време и не играат толку добро. Променливите резултати на Баерн, чии играчи се костур во националниот тим, се одразија и врз „Елф“. Сепак, ова е прилика да излезат од кризата, иако нема да им биде лесно, бидејќи Холандија со новиот селектор Куман, игра солидно и нема лесно да се предаде.

Предлог тип: Т2 2+& ГГ (2.70)

Ирска – Данска (20.45 часот)

Ова е еден од најтешките мечеви за прогнозирање. Ирците тргнаа лошо во Лигата на нации, загубија убедливо од Велс, а тој ист Велс, три дена подоцна загуби од Данска. Не треба да се заборави дека лани, Данска во баражот за СП, ја растури Ирска во Даблин со 5:1, па и психологијата ќе игра улога.

Предлог тип: Х (2.95)

Бугарија – Кипар (20.45 часот)

Нашиот источен сосед, има низа од три победи по ред, од кои две во Лигата на нации, додека Кипар со победата над Словенија, прекина серија од осум меча (седум порази) без радост. Кипар е многу лош гостин, а при последното гостување во Софија пред шест години, загуби со 0:1.

Предлог тип: Т1 2+ (1.83)

Норвешка – Словенија (18.00 часот)

После многу лошата слика која ја оставија во квалификациите за СП во Русија, Словенците го сменија селекторот, но ниту со Кавчич не бележат подобри резултати. Норвежаните би требало да го искористат домашниот терен. Словенија нема ниту еден нерешен резултат во 2018 година.

Предлог тип: 1&3+ (3.05)

Лихтенштајн е како создаден за Македонија да се радува

Трајан Маневски

-

13.10.2018

0

Македонија едноставно не можеше да посака подобар ривал за да го прослави јубилејот 25 години од првиот одигран меч. Лихтенштајн е селекцијата против која Македонија има создадено позитивна историја.

Досега имаме одиграно седум натпревари против Лихтенштајн, а сме се радувале на шест победи, додека само еден натпревар завршил нерешено. Противникот никогаш не триумфирал. Против ниту еден друг тим немаме подобар биланс. Дури и гол разликата е неверојатно позитивна за „црвено-жолтите“, а тоа е најмногу благодарение на историската победа од 11:1.

Триумфот кој засекогаш ќе го памтиме против Лихтенштајн е на дуелот кој се одигра на 9 ноември 1996 година. Во квалификациите за пласман на СП 1998 година, на гостински терен Македонија се радуваше на највисоката победа во 25-годишната историја. Победата од 11:1 останува рекордна за Македонија, но и една од најголемите во европските квалификации. Стрелци на тој меч беа: Дејви Главевски во 8мин., 12′, 60′, Ѓорѓи Христов 23′, Митко Стојковски 30′, 43′, Тони Мицевски 45′, 49′, Саша Ќириќ 53′, 87′ и Ванчо Мицевски во 90 минута од средбата.

Сега на Македонија не и треба толку убедлив триумф. Најважно е да се освојат трите бода и да се продолжи победничката низа во Лигата на нации. По два одиграни меча, Македонија е лидер со шест бода. Нови три бода ќе значи чекор поблиску на нашата кон обидот да се стигне на Европското првенство во 2020 година.

Безбедносните камери го снимија инцидентот на Арда Туран (Видео)

Златко Јуруковски

-

13.10.2018

0

На 10 октомври, турскиот фудбалер Арда Туран, беше учесник во тепачка пред една дискотека во Турција, а на виделина излегоа и снимки од тој настан. Туран најверојатно под дејство на алхокол, во раните утрински часови го нападна пејачот Беркај Шахин, откако претходно и се додворуваше на сопругата на пејачот.

Откако се свести што направил, екс фудбалерот на Барселона и Атлетико Мадрид, во болница му се извини на Беркај и со пиштол во рака, од жената на пејачот бараше да го убие.

Беркај заврши со скршен нос како последица од ударот со глава на Туран. Сопругата на играчот на Башакшехир е трудна и наскоро треба да се породи, па тој јавно и се извини и на својата жена Аслихан.

https://www.youtube.com/watch?v=jH-ge9iYwDE

Ѓоковиќ по кратка постапка го скроти Зверев

Златко Јуруковски

-

13.10.2018

0

Новак Ѓоковиќ е првиот финалист на Мастерсот во Шангај, откако во полуфиналето на убедлив начин, за само еден час игра го порази Александер Зверев со 6-2, 6-1. Во финалето, Новак ќе се сретне со Роџер Федерер или Борна Ќориќ.

Германецот со руско потекло, лани во финалето во Рим го победи Ѓоковиќ, но малку падна во формата, на големите турнири нема позабележителни резултати, а денеска налета на расположениот Србин, па немаше шанса.

Ѓоковиќ има серија од 17 победи по ред, ја брка четвртата титула во Шангај, ова му е 103-то финале во кариерата (има 31 титули), и од наредниот понеделник, ќе се искачи на втората позиција на АТП листата.

Барса сака да го задржи Меси најмалку до 2022 година

Томас Ѓорѓиевски

-

13.10.2018

0

Раководството на шпанскиот првак Барселона, планира да го продолжи договорот на Лионел Меси кој важи до 2021 година, на најмалку уште една година. Во таборот на каталонците веруваат дека големината на Меси уште долго време ќе им биде од корист, а дури постои можност новиот договор да трае до 2023 година, доколку двете страни се согласат.

Шпанскиот медиум „Мундо депортиво“, најавува дека за овој договор ќе се преговара по завршувањето на оваа сезона. Меси во 2017 година потпиша нова соработка со која се обврза да остане на „Камп ноу“ до 2021 година, но во неговата клаузула стои дека може да ја напушти Барса една година порано и тоа без обештетување, само доколку замине во клуб кој не е елитен, како што направија Чави и Иниеста.

Сепак, желбата на управата е Меси да ја заврши професионалната кариера токму во Барселона, иако Аргентинецот во неколку наврати посочи дека сака да ја заврши кариерата во дресот на неговиот омилен клуб, Њуелс олд бојс од Аргентина.

„Лалињата“ заборавија како се победува против Германија

Томас Ѓорѓиевски

-

13.10.2018

0

Најмалку три генерации се сменија, а Холандија сѐ уште нема најдено победнички рецепт со кој ќе ја совлада Германија. Малкумина паметат кога последен пат „лалињата“ се радувале против „панцерите“, тоа беше во 2002 година. Во средба од пријателски карактер Холандија победи со 3-1, со головите на Патрик Клајверт, Џими Флојд Хаселбенк и Руд Ван Нистелрој.

Од тогаш, Германија победувала или ремизирала против Холаѓаните на четири пријателски пресметки, додека само два пати се сретнаа на Европско првенство, и тоа два пати во групна фаза.

По пауза од шест години, овие две селекции повторно ќе играат меѓусебе, а со оглед дека играат во Лигата на Нации, и двете страни посакуваат победа за да го следат чекорот со Франција, која има четири бода од два меча во групата 1 од сегментот А.

Токму Франција ја прекина низата од четири меча без пораз на Холандија, на 9-ти семтепври „триколорите“ славеа победа од 2-1, додека Германија три дена претходно одигра 0-0 во дуелот на двата последни светски шампиони, меч на кој избраниците на Јоаким Лев за прв пат настапија по раната елиминација од Мундијалот во Русија.

На сите меча во 2018 година, Холандија и Германија само еднаш успеале да ја сочуваат мрежата, што покажува дека и двете селекции имаат нестабилна одбрана. Голови може да се очекуваат, со тоа што Германците се фаворити да освојат три бода од оваа средба, „двојката“ во нивна корист има квота од 2.25, за победа на Холандија коефициентот е 3.05, додека за евентуално реми е 3.45.

Анри три години на клупата на Монако

Томас Ѓорѓиевски

-

13.10.2018

0

Ексфудбалерот на Арсенал и Франција, Тиери Анри, се согласи на тригодишна соработка со Монако, откако ја презеде тренерската работа по отказот на Леонардо Жардим. Монако се наоѓа во незавидна позиција на почетокот од сезоната, по што управата реши дека е време за смена на шеф на стручниот штаб, а Анри беше и фаворит да застане на клупата на „кнезовите“.

Иако Французинот вчера беше со репрезентацијата на Белгија во победата над Швајцарија од 2-1 во Лигата на Нации, тој меч ќе остане како последен во неговата задача како помошник на Роберто Мартинез. Вчера во текот на денот веќе ставил потпис на договорот со Монако, а денес и официјално ќе биде промовиран за тренер на првата екипа.

Го очекува тешка задача, вицешампионот Монако по девет меча во францускиот шампионат се наоѓа на 18-тото место на табелата со само шест бода, со само една победа, три ремија и пет порази.

Анри својата фудбалска кариера ја започна токму во Монако, и со нив стана шампион на Франција во 1997 година. Се шпекулираше дека легендата на „топчиите“ ќе биде менаџер на англискиот второлигаш Астон Вила, но управата од овој клуб се одлучи за Дин Смит.

Познат распоредот за сезоната 2019 во Формула 1

Томас Ѓорѓиевски

-

13.10.2018

0

Познат е возниот ред, односно распоредот за сезоната 2019 во Формула 1. Kако и оваа сезона, шампионатот ќе започне од Австралија на 17-ти март, а ќе заврши со трката во Абу Даби на првиот ден од декември.

По состанокот на ФИА одржан во Париз, одлучено е дека ќе се возат истите 21 трки, исто како во 2016 и 2018 година, а 11 од нив ќе се возат во Европа, пет во Азија, четири трки во Јужна и Северна Америка, и секако, Големата награда на Австралија.

На јубилејот за 25 години, го чекаме 250 погодок за Македонија

Трајан Маневски

-

13.10.2018

0

Датумот 13 октомври засекогаш ќе биде запишан со златни букви во фудбалската историја на Македонија. На овој датум, пред точно 25 години, нашата најдобра селекција го одигра првиот официјален натпревар.

Беше тоа пријателска средба против Словенија во Крањ, а Македонија започна триумфално. Победа од 4:1 за „црвено-жолтите“ и историски прв погодок постигнат од Зоран Бошковски-Чоко.

Од тој 13 октомври 1993 година, до денес, Македонија има одиграно точно 222 натпревари. Вечерва на програмата е 223 дуел и тоа против Лихтенштајн, на арената „Филип Втори“ во Скопје. Досегашниот биланс е 63 победи, 57 нерешени средби и 102 порази. Гол разликата е 249 дадени погодоци и 299 примени. Тоа значи дека вечерва можеме да се израдуваме на 250 погодок за националниот тим, но и да тагуваме за 300-от примен погодок.

ВКУПНО 12 КВАЛИФИКАЦИСКИ ЦИКЛУСИ БЕЗ УСПЕХ, ДАЛИ „13-КА“ ЌЕ НИ БИДЕ СРЕЌНА

Во четврт век од постоењето на националниот тим, Македонија се нема израдувано на голем успех. Нема пласман на големо натпреварување, иако досега репрезентацијата има одиграно по шест квалификациски циклуси за Европско и за Светско првенство.

Во квалификациите за пласман на Европско првенство, вкупно имаме одиграно 58 натпревари, а билансот е 11 победи, 14 нерешени и 33 порази, со гол разлика од 59 дадени и 90 примени голови. Кога се работи за квалификации за СП, Македонија во 60 меча во обид да стигне до Мундијал, има 14 победи, 12 реми и 34 порази. Гол разликата е 72:104.

Можеби најголема шанса за пласман на завршницата на големо натпреварува, Македонија ја има токму сегам во 13-тиот квалификациски циклус за големо натпреварување. Во Лигата на нации, нашата селекција е првопласирана и со евентуален нов триумф вечерва против Лихтенштан, ќе бидеме пред промоција на првото место во групата. Ако тоа се случи, би значело дека Македонија ќе биде меѓу оние четири селекции од сегментот Д, кои ќе се борат за местото кое води директно на Европското првенство во 2020 година.

СМЕ НЕМАЛЕ РИВАЛ САМО ОД ОКЕАНИЈА

Најмногу натпревари Македонија има одиграно против ривали од европската зона, односно членки на УЕФА. Дури 190 натпревари против европски противници, а билансот е 59 победи, 45 нерешени и 86 порази со гол разлика 227:260.

Потоа следат дуелите против слекциите од азиската конфедерација. Против нив во 19 меча имаме само една победа и тоа против Катар. Дури 10 порази и осум нерешени средби покажуваат дека не ни лежат овие ривали со кои имаме гол разлика од 10 дадени и 23 примени голови.

Против ривали од Африка имаме пет меча, на кои три пати сме ремизирале, а сме загубиле два пати. Со национални селекции од Конкакаф зоната имаме 4 меча и тоа со позитивен биланс од 2 победи, едно реми и 1 пораз (5:2 гол-разлика). Само против Еквадор имаме одиграно против селекции кои се од КОНМЕБОЛ зоната во Јужна Америка. На таа средба победивме со 2:1. Од земјите кои веќе не постојат. 3 дуели со Србија и Црна Гора и три порази. Единствено ниту еден меч немаме одиграно од репрезентациите кои се дел од Океанија.

Македонија е голем фаворит на денешниот дуел против Лихтенштајн и очекуваме радост на денот на кој пред точно 25 години го одигравме првиот натпревар во фудбалската историја.

Повредата на Салах не е сериозна

Томас Ѓорѓиевски

-

13.10.2018

0

Салах вчера блескаше во дресот на Египет по убедливата победа над Есватини со 4-1. Египѓанецот постигна гол директно од корнер, убаво се забавуваше на теренот се до последните неколку минути од средбата, кога поради повреда мораше да биде заменет.

Иако се виде дека Салах има болки, сепак, асистентот на репрезентацијата, Хени Ремзи, истакна дека не се работи за посериозна повреда, а тоа ќе го потврдат и следните медицински прегледи.

„Првите прогнози од лекарскиот тим се дека Салах заработи повреда на мускулот на ногата. Замената беше да се избегне поголема штета, тој дополнително ќе оди на прегледи, но според мене, не се работи за посериозна повреда“, истакна Ремзи по мечот.

По репрезентативните обврски Салах ќе се врати во Ливерпул каде со своите „црвени“ треба да го одигра мечот против Хадерсфилд во рамките од Премиер лигата, но пред тоа, Египет ќе се сретне уште еднаш со селекцијата на Есватини, на 16-ти октомври, во квалификациите за Африканскиот куп.