Белорусинката Арина Сабаленка е освојувачка на трофејот во Австралија опен во женска конкуренција. Во големото финале, кое траеше два и пол часа, Сабаленка со 2:1 во сетови ја победи Елена Рибакина од Казахстан.
За Сабаленка ова е најголем успех во кариерата и прв Гренд слем трофеј. Претходно два пати има играно во полуфинале на САД Опен и еднаш во полуфинале на Вимблдон, но никогаш не играла меч за трофеј. Сега, во првиот таков обид, стигна до тронот.
Your #AO2023 women’s singles champion, @SabalenkaA 🙌@wwos • @espn • @eurosport • @wowowtennis • #AusOpen pic.twitter.com/5ggS5E7JTp
— #AusOpen (@AustralianOpen) January 28, 2023
Во финалето, Сабаленка не започна најдобро, па во првиот сет два пати губеше гејм на свој сервис, па го загуби првиот сет со 6:4. Во вториот сет, еден брејк беше решавачки, а го освои Сабаленка, кога поведе со 3:1 и до крајот ја задржа предност за 6:3 и израмнување на 1:1 во сетови.
Третиот сет кој требаше да го реши шампионот, беше вистински шлаг на финалето. Двете тенисерки беа сигурни на свој сервис до 3:3. Во седмиот гејм се случи клучниот момент. По голема борба, Сабаленка ја искористи третата брејк топка и поведе со 4:3. На 5:4, белоруската тенисерка сервираше за шампионска титула и имаше дури три пропуштени меч топки, но на крајот, четвртата меч топка ја доби Сабаленка и се израдува на најголемиот успех во кариерата.
Овој триумф на Сабаленка е сосема заслужен ако се знае дека во 2023 година, до финалето, имаше биланс од 10 победи и не само што немаше загубено меч, туку немаше загубено ни сет. Против Рибакина го загуби првиот сет, но успеа да се врати и да слави.
