Екстракласа, елитната лига на полскиот фудбал, моментно е најинтересната во Европа, се игра најлудата сезона во историјата, на девет кола до крајот сите 18 клуба математички можат или да ја освојат титулата или да испаднат од лигата.
Разликата од првиот до последниот е 18 бода, а од првиот до претпоследниот само 13. Три тима се на делба на првото место со по 41 бод. Лидер е Заглембје, кој ја заврши минатата сезона на 15-тото место, само една позиција над зоната за испаѓање. Најголемиот и најуспешниот клуб во земјата, Легија, е во зоната за испаѓање.
Помеѓу 2019 и 2024 година Полска доби три нови шампиони кои првпат станаа прваци. Во последната деценија паметните клубови ги победуваат богатите. Трпението и визијата ги победуваат парите. Како ќе се заврши оваа сезона, веројатно нема да се знае до последното коло.
