Шведскиот тренер Свен-Јоран Ериксон ја шокира јавноста изјавувајќи дека неговиот живот се ближи кон крајот и дека можеби ќе живее уште една година.
Ериксон во разговор за шведските медиуми откри дека боледува од карцином во терминална фаза и поради тоа се откажал од враќањето на тренерската работа.
„Се претпоставуваше дека имам карцином и тоа се покажа како точно. Карциномот е во терминална фаза и ми преостанува уште околу една година, во најлош случај можеби и помалку“, изјави Ериксон, кому последниот тренерски ангажман му беше на клупата на репрезентацијата на Филипини, која ја напушти во 2019 година.
Ериксон тренерската кариера ја започна во Дегерфорс, а потоа ги тренираше и Гетеборг, Бенфика, Рома, Фиорентина, Сампдорија, Лацио, Манчестер сити, Лестер, Гвангжу, Шангај и Шенжен.
Фудбалските фанови најмногу го паметат како селектор на Англија, и тоа од 2001 до 2006 година.