Серхио Рамос денеска со капитенската лента на рака треба да ја предводи шпанската репрезентација на гостувањето кај Шведска, во обид Црвената фурија и официјално да обезбеди место на завршницата на Европското првенство кое се игра следната година. За Рамос ова ќе биде 169-ти настап во националниот тим, со што само го подобрува рекордот за играч со најмногу настапи во репрезентацијата. Зад него сега остана и Икер Касилјас, кој имаше 168 меча за Шпанија.
Прославувајќи го рекордот, но и фактот дека вечерва Шпанија гостува кај Шведска, Рамос реши да открие зошто го носи дресот со бројот 15 во националниот тим. Тоа е во чест на трагично починатиот Антонио Пуерта. Рамос и Пуерта беа соиграчи во Севилја, а Антонио почина од срцев удар, и тоа за време на меч од шпанското првенство. Пуерта беше член и на шпанската репрезентација и го носеше дресот со бројот 15. По неговата смрт, Рамос реши во чест на Антонио да го носи токму дресот со бројот 15 кога ќе игра за Шпанија.
„Пред 13 години и една недела играше за Шпанија на гостувањето во Шведска. Требаше да одиграш уште многу мечеви, но да знаеш дека секогаш ќе бидеш дел од овој тим. Мојот број 15 е за тебе, бидејќи ти го носеше тој број. Сите ќе те памтиме вечно“, напиша Рамос во пораката на „Инстаграм“.
